Nova convocatoria para estancias lingüísticas en Galicia e no estranxeiro para alumnado de ESO e BAC
A Consellería ofrece 1.600 prazas e sufragaráentre o 50% e o 87% dos custos. Pódese realizar a solicitude dende o 2 ao 26 de marzo.
Por E.P. | SANTIAGO DE COMPOSTELA | 01/03/2020 | Actualizada ás 18:24
A Consellería de Educación, Universidade e Formación Profesional convocou 1.600 prazas para que o alumnado galego de ESO e Bacharelato realice estancias lingüísticas en Galicia e no estranxeiro para "mellorar as súas competencias" nun idioma estranxeiro.
Segundo informou a Xunta nun comunicado, a Consellería sufragará entre o 50% e o 87% do custo das distintas estancias, que poden ser en réxime residencial ou familiar.
No caso de alumnado de 1º, 2º, 3º e 4º da ESO só hai oferta de réxime residencial na Comunidade, cun total de 1.025 prazas en estancias dunha a dúas semanas e con profesorado nativo.
Por outra banda, para o estudantado de 1º e 2º de Bacharelato hai convocadas 575 prazas, en réxime familiar ou residencial, en Galicia e no estranxeiro -Canadá, Reino Unido, Francia e Portugal- e con profesorado nativo. As estancias poden ser, de unha a tres semanas no verán, segundo a opción, e de catro semanas na actividade de integración.
A Xunta explicou que, para poder optar a estas bolsas, os candidatos deben estar a estudar algún dos cursos sinalados en centros públicos galegos durante o curso 2019-2020. Ademais, terán que contar cunha nota mínima de 'Ben' ou de 6 no curso anterior e ter superadas todas as materias nese mesmo ano.
Os criterios a seguir para dar as bolsas serán a cualificación media do curso 2018-2019 e a renda per cápita da familia. Repararán tamén no feito de pertencer a unha familia numerosa, se conta cun membro cunha discapacidade igual ou superior ao 33% ou pensionista de "gran invalidez", igual que mirarán se o candidato xa obtivera unha axuda similar na anterior convocatoria.
O prazo para realizar a solicitude estará aberto desde este luns 2 de marzo ata o 26 do mesmo mes e poderá formalizarse na web da Consellería de Educación, a través de presentación telemática vía a sede electrónica da Xunta ou nos rexistros que sinala a normativa.
PRÁCTICA DO IDIOMA EN ACTIVIDADES
Ademais, o Goberno galego subliñou que esta iniciativa busca que o alumnado poña en práctica o idioma "todo o día" en distintas actividades, como competicións deportivas, xogos, talleres ou excursións. Así, o estudantado terá unha formación lingüística, social, cultural e ambiental, "promovendo unha inclusión total na lingua estranxeira".
A Xunta destacou que os cursos realizados no estranxeiro teñen como obxectivo que os estudantes teñan "un verdadeiro contacto idiomático" e asistirán a clases con alumnos de distintas nacionalidades.
