Galicia supera a súa marca con máis de 50.000 toneladas de vidro reciclado no 2019
A directora xeral de Calidade Ambiental destacou que a reciclaxe de vidro é unha mostra da "implicación e toma de concienciación" da cidadanía galega coa economía circular.
Por E.P. | SANTIAGO DE COMPOSTELA | 11/03/2020 | Actualizada ás 16:05
Galicia reciclou en 2019 un total de 51.967 toneladas de vidro, co que o pasado foi o primeiro ano no que a comunidade superou as 50.000 toneladas recollidas no colector verde.
A directora xeral de Calidade Ambiental, Cruz Ferreira, e o xerente da zona Galicia-Asturias de Ecovidrio, Germán Fernández, presentaron este mércores os resultados da reciclaxe de vidro na comunidade, onde se depositaron unha media de 66 envases por persoa, 19,3 quilos por habitante, por encima da media do Estado.
Cruz Ferreira destacou que a reciclaxe de vidro é unha mostra da "implicación e toma de concienciación" da cidadanía galega coa economía circular, xa que, comparando as cifras actuais coas doutros anos, en Galicia recíclase un 33% máis que hai cinco anos (39.119 toneladas en 2014) e 7,6% máis que o ano anterior (48.308 toneladas).
En canto á recollida por provincias, A Coruña foi na que máis se reciclou, cunha media de 19,1 quilos por habitante e un incremento de case 1.300 toneladas con respecto a 2018; seguida de Pontevedra (17,7 kg/hab). As provincias de Ourense e Lugo conseguiron unha taxa de reciclaxe de 16,8 quilos e 16,2 quilos por habitante, respectivamente.
A directora xeral tamén subliñou o envío a Ecovidrio de case 20.000 toneladas (18.999) de residuos de envases de vidro que chegaron ao Complexo Medio Ambiente de Sogama en Cerceda na bolsa negra e que Sogama recuperou para a súa xestión por parte desta compañía.
Ferreira Costa destacou que, detrás destes datos, están dous elementos importantes, os colectores de reciclaxe de vidro, repartidos en 16.515 puntos ao longo da xeografía galega; e as campañas informativas e divulgativas.
