Por Moncho Mariño | Santiago de Compostela | 17/04/2020 | Actualizada ás 11:38
Nuestra Señora de la Esperanza, é un centro de maiores dependente da Fundación San Rosendo en Ourense . Cando se coñeceron os primeiros positivos, familiares de usuarios internos chamaron a Galicia Confidencial para saber se era certo xa que logo de chamar á residencia "as monxas dicían que non tiñan constancia de nada".
Hoxe é o principal centro de contaxio na provincia de Ourense. Alí morreron xa 18 usuarios no propio centro, sen que, polo momento, se saiba o número exacto de mortos xa que a Xunta non facilita o dato dos falecidos desa residencia trasladados ao hospital. Actualmente hai 102 maiores e 35 traballadores contaxiados nestas instalacións.
Tras a falta de comunicación inicial, familiares chamaron explicacións ao bispado de Ourense. Finalmente, accederon a ter un encontro con representantes de familiares. O encontro saldouse coa resposta do representantes eclesiásticos: “Facemos o que podemos, estamos rezando por eles”.
SAN CARLOS DE CELANOVA
Outro dos focos do contaxio nesta provincia é a residencia San Carlos de Celanova, pertencente á Fundación San Carlos. Foi o primeiro gran foco masivo en Galicia e no que, grazas a entrega das traballadoras do centro evitouse, probablemente, unha traxedia. Polo momento, a Xunta só computa un morto na propia residencia pero non facilita os datos dos usuarios dese centro que morreron no hospital. Actualmente, hai 21 usuario e 18 traballadores contaxiados.
Non obstante, ao principio sete persoas non puideron ser trasladas a Baños de Molgas, unha das residencias integradas da Xunta. É o caso da tía de María, persoa dependente e que non puido ser levada á residencia de Baños por “non estar habilitada para garantir a súa mobilidade”. Pouco a pouco foron chegando pacientes que se recuperaron en Baños de Molgas.
Os familiares enviaron un comunicado para que a administración galega se faga cargo da residencia. “Foi das primeiras en ter positivos por coronavirus”. Moitos dos empregados acabaron dando positivo quedando só catro auxiliares.
SEN MÉDICO E ENFERMEIRA
Houbo contratación de persoal, mais agora mesmo non hai médico nin enfermeira. Os labores médicos estaos levando persoa do PAC (Punto de Atención Continua) de Celanova. “As auxiliares facían máis do que podían facer”. Ademais das contratacións, tamén se reincorporou persoa que estaba de baixa.
A isto engádese a angustia dos residentes que “non entenden por que non podes ir”, di María, debido ao illamento por cuestións de seguridade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.