O Concello de Oleiros pide axuda ao Goberno para repatriar uns veciños desde Ecuador
Levan sen poder saír do país desde o pasado 1 de abril, cando tiñan contratado o billete de volta.
Por E.P. | A CORUÑA | 07/05/2020 | Actualizada ás 20:29
O Concello de Oleiros reclamou ao Goberno que "actúe" para que unha veciña deste municipio e o seu fillo de dous anos poidan regresar de Ecuador onde quedaron "atrapados" polo actual contexto de crise sanitaria xerada pola COVID-19.
Nun comunicado, explica que Lorena Peralta e o seu fillo, ambos veciños de Dorneda, non poden saír dese país desde o pasado 1 de abril "cando tiñan contratado un billete coa compañía aérea Iberia que foi anulado polo estado de alarma".
"Igual que decenas de cidadáns e cidadás españois, quedou fóra dos voos de repatriación que houbo durante estas semanas, incluído o do pasado 4 de maio, estando previsto que o seguinte sexa o 2 de xullo", engade.
Tamén explica que a embaixada española de Quito e o consulado ecuatoriano en Vigo "non atenden nin informan as persoas atrapadas en Ecuador". Por outra banda, incide en que esta veciña necesita incorporarse de maneira "urxente" á súa actividade laboral para poder obter ingresos económicos.
Por todo iso, o Concello de Oleiros reclama que o Ministerio de Asuntos Exteriores "informe a todas as persoas afectadas sobre a situación". "O Goberno debería fretar os avións necesarios e realizar as repatriacións", apostila.
