Por Europa Press / Redacción | Santiago de Compostela | 20/05/2020 | Actualizada ás 18:17
Con motivo da celebración das próximas eleccións autonómicas do 12 de xullo, o PSdeG prevé avanzar na mobilidade e programar actos de maior dimensión a medida que progrese o proceso de desescalada e "sempre cumprindo as normas de seguridade e precaución".
Diso informaron nun comunicado os socialistas galegos tras unha reunión telemática da executiva do PSdeG e no que sinalou que o seu secretario xeral, Gonzalo Caballero, seguirá mantendo a súa axenda de contactos cos cargos institucionais e cos distintos sectores da cidadanía de Galicia co obxectivo de mobilizar ao electorado progresista.
Ademais, o presidente do partido e senador Xoaquín Fernández Leiceaga coordinará a actualización do programa electoral para incluír o traballo e os informes dos grupos de expertos en sanidade e económica convocados pola formación por mor da crise do coronavirus.
Na súa intervención durante a primeira reunión da súa executiva que os socialistas celebran por videoconferncia tras a convocatoria electoral, Gonzalo Caballero destacou que "a crise do COVID-19 fai máis imperiosa a necesidade dun cambio en Galicia" para ter un Goberno na Xunta que aposte polo público.
"Hai que activar aos 10.000 militantes socialistas de Galicia para retirar a quen foi o campión dos recortes na sanidade pública", sinalou o líder do PSdeG, que avanzou que a campaña ten que servir para mobilizar ao electorado progresista que non se quere resignar a seguir pola senda da precarización e privatización que, segundo indicou, caracteriza a etapa de Feijóo na Xunta.
Neste sentido, puxo o foco en que a tarefa que os socialistas teñen por delate é mostrar que o PSdeG ten o "mellor proxecto de futuro para Galicia", máxime para afrontar esta crise sanitaria, económica e social derivada da pandemia.
"Temos un proxecto de compromiso coa sanidade pública, co fortalecemento do estado do benestar e unha política económica que non deixe a ninguén atrás", resaltou.
"AS RECEITAS QUE NECESITA GALICIA"
"As receitas que necesita Galicia son as que temos no noso ideario", destacou o máximo dirixente do PSdeG, que resaltou o traballo feito "á beira da cidadanía" por parte dos máis de cen alcaldes e alcaldesas socialistas de Galicia, polos presidentes das deputacións da Coruña, Lugo e Pontevedra, e polo propio goberno de España.
"Axudas para os autónomos por primeira vez neste país, mantemento dos salarios dos traballadores, medidas de reforzo para empresas, prohibición de realizar desafiuzamentos durante a pandemia, aumento das bolsas de estudos, renda mínima vitial", enumerou Gonzalo Caballero, que contrapuxo estas medidas coa actitude da dereita e a ultradereita "alentando manifestacións no barrio de Salamanca".
ESTADO DE ALARMA
En paralelo, o máximo dirixente do PSdeG criticou o comportamento político do Partido Popular "de Casado, Ayuso e Feijóo". "Ten unha posición infumable", sinalou á vista do seu intento por "botar abaixo como sexa o estado de alarma".
Sobre todo, como sinalou, porque "todos os galegos saben que esta ferramenta é fundamental para levar a cabo o proceso de desescalada e desconfinamiento con todas as garantías".
BOCEIRA A MIGUEL TELLADO
O PSdeG recomendoulle este mércores ao Partido Popular que lidera Alberto Núñez Feijóo que "se quere reducir a campaña lle poña unha boceira" ao seu secretario xeral, Miguel Tellado.
Nun comunicado remitido aos medios despois de que Tellado propuxese que os partidos falasen para reducir a campaña, o PSdeG lembrou que a lei establece que a campaña electoral debe durar 15 días e subliña que "ninguén pode reducir as garantías democráticas".
"O PP debe impulsar un cambio nos medios informativos públicos galegos para garantir a pluralidade e a veracidade, e ademais garantir varios debates coa presenza de Feijóo", reclaman os socialistas.
Os socialistas, que lembran que a lexislación establece a duración das campañas, consideran que parece que Feijóo quere avanzar cara a un "sistema de partido único" e avisa de que os galegos non están dispostos a "retroceder en dereitos".
"Feijóo errou ao pór a data electoral estando en plena emerxencia sanitaria, e o que ten que facer agora é dispor de todos o mecanismo para que o proceso leve a cabo con garantías democráticas e sanitarias", sinala.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.