A Deputación de Pontevedra pon en marcha un "ambicioso" plan de apoio aos festivais de música

A Deputación de Pontevedra avanzou este martes a posta en marcha dun "ambicioso programa" bianual destinado a dar unha "resposta rigorosa" ás consecuencias da crise da COVID-19 no ámbito dos espectáculos musicais en directo.

Farao apoiando ao sete festivais integrados na marca de calidade #RíasBaixasFest --PortAmérica, Atlantic Fest, Sinsal, SonRías Baixas, Revenidas e Vive Nigrán--, cuxos representantes mantiveron este martes un encontro telemático coa presidenta provincial, Carmela Silva.

Silva detallou que se trata dunha folla de ruta destinada a "manter as estruturas das empresas, avanzar a través da música na promoción do destino Pontevedra Provincia e consolidar os #RiasBaixasFest como produto turístico sustentable e diferenciado".

"Con esta proposta garantimos os recursos deste ano e o noso compromiso para 2021, a fin de que todos os festivais se manteñan como unha gran referencia desta provincia", exemplificou.

Para iso, a Deputación de Pontevedra establecerá con cada un dos festivais contratos bianuais vinculados á celebración do evento no próximo ano 2021, pero co engadido dunha serie de fitos promocionais xa neste 2020, tanto do festival como do destino Pontevedra Provincia.

Estes 'fitos' consistirían na celebración de eventos en pequeno formato, promoción do festival e do seu emprazamento, así como de valores como as súas tradicións, gastronomía, cultura ou natureza. Deste xeito, manteríanse os contratos de patrocinio para o período 2020-2021 e, en paralelo, traballarase no Plan de Turismo de Festivais, "baixo as pautas da sustentabilidade, a mellora continua e a optimización deste produto cultural para a promoción turística como obxectivo irrenunciable", dixo o organismo provincial.

Edición do SonRías Baixas 2018. SONRÍAS BAIXAS - Arquivo