Dúas novas campañas en liña para pór en valor o patrimonio da provincia de Pontevedra
Trátase de ilustrar monumentos, vilas termais ou espazos declarados bens de interese cultural das Rías Baixas por medio de vídeos, postais, fotografías e publicacións históricas que se conservan en bo estado.
Por E.P. | PONTEVEDRA | 27/05/2020 | Actualizada ás 20:22
A Deputación de Pontevedra e Turismo Rías Baixas porán en marcha nos próximos días dúas novas accións destinadas a promocionar de maneira virtual os principais activos turísticos da provincia ata que se poidan retomar as visitas regulares.
Estas dúas campañas, 'As Rías Baixas visítante' e 'Viaxe ao pasado', teñen como obxectivo facilitar aos turistas a información relacionada co patrimonio de Pontevedra e fomentar as visitas aos seus atractivos principais.
A primeira das campañas consiste na organización de visitas guiadas virtuais a algúns dos monumentos ou recunchos naturais máis singulares da provincia. Así, unha informadora turística da institución provincial faralle chegar ao público a historia de cada recurso a través de breves vídeos que se difundirán nas redes sociais de Turismo Rías Baixas e da Deputación de Pontevedra.
Estas visitas guiadas virtuais programaranse os mércores e venres ás 10,00 horas, a partir do 27 de maio, nas redes sociais corporativas. Os vídeos estarán posteriormente accesibles na canle de Youtube de Turismo Rías Baixas.
Por outra banda, tamén se recorrerá ás redes sociais de Turismo Rías Baixas para convidar o conxunto da cidadanía a realizar un 'Viaxe ao pasado', aproveitando o material histórico que custodia o Servizo de Patrimonio Documental e Bibliográfico do Arquivo Provincial. Trátase de ilustrar monumentos, vilas termais ou espazos declarados bens de interese cultural das Rías Baixas por medio de vídeos, postais, fotografías e publicacións históricas que se conservan en bo estado.
