AGE sae en defensa da RAG

Insiste en que o seu orzamento é "insuficiente". Ata o de agora é o único grupo que se ten posicionado sobre a polémica entre a Xunta e a Academia. BNG e PSdeG apuntan á vinculación de Ferrín con AGE.

Por Galicia Confidencial | Compostela | 10/01/2013 | Actualizada ás 12:44

Alternativa Galega de Esquerda considera "insuficiente" a achega da Xunta á Real Academia Galega e esixe estabilidade económica para a institución. Precisamente, este é o mesmo argumento utilizado o mércores polo presidente desta entidade, Xosé Luis Méndez Ferrín, logo da súa entrevista co presidente da Xunta e co conselleiro de Cultura e Educación para abordar o financiamento da RAG.

Así, a Administración autonómica achegará 520.000 euros este ano --200.000 euros máis do previsto-- á RAG para compensar a redución da transferencia estatal --de 682.000 a 341.000 euros--. Entre a achega ratificada este mércores pola Xunta e os 341.000 euros comprometidos polo Ministerio de Cultura, a entidade ten garantido polo menos uns ingresos de 861.000 euros para este ano. "Agradécese á achega pero é insuficiente", apuntou Ferrín. E é que os responsables desta institución estimaban nun millón de euros os fondos necesarios para o se perfecto funcionamento.

Estabilidade

AGE insiste tamén nos argumentos de Ferrín e esixe estabilidade para o financiamento da entidade. Esta formación pide que a RAG reciba o mesmo trato que as academias das outras nacións do Estado español e tamén un compromiso por parte do Goberno galego para o financiamento plurianual da mesma. "O obxectivo desta reclamación é garantir a continuidade das diferentes seccións da institución e dos seminarios de traballo, ademais de fixar as condicións laborais do cadro de investigadoras e investigadores e o resto do persoal", destaca a coalición.

Ademais, a formación liderada por Beiras destaca que as súas homólogas catalá, o Institut d’Estudis Catalans, e vasca, a Academia de la Lengua Vasca-Euskaltzandia, obtiveron dos seus respectivos executivos en 2012, 5.538.947 euros e 1.332.820 euros. “O que non pode ser é que a Real Academia Galega, a principal institución que vela pola lingua galega, teña que andar cada ano a mendigar o seu financiamento e dependa da vontade dos gobernos de quenda”, sinala o parlamentario Xabier Ron.

Apoio

Ata o momento, AGE é a unica formación que se ten posicionado contundentemente a favor dun maior financiamento para a RAG. Antes da entrada de AGE na Cámara galega, tanto o BNG coma o PSdeG presentaron varias iniciativas nas que lle reclamaban a Xunta a equiparación da RAG coas academias catalá e vasca e criticaron a discriminación que sufría por parte do PPdeG.

Pero agora, nin os socialistas, nin os nacionalistas teñen entrado na guerra mediatica entre a Xunta e a Academia, mesmo, logo da publicación por parte do ABC de que Ferrín ten a súa filla e ao compañeiro desta empregados nesta institución e que se despraza de Vigo á Coruña nun Audio 8. "Preguntadelle aos de AGE que se pronuncien sobre iso. Nós non imos a entrar a valorar estas cuestións do presidente dunha institicuón que forma parte desa coalición", apuntan fontes nacionalistas consultadas. "Está claro que hai discriminación coa RAG pero hai xeitos e xeitos de manifestalo. E tamén comportamentos, tanto persoais coma políticos. Nós non estamos pola politización da Academia", apunta outro deputado consultado do PSdeG.

Noticias relacionadas

9 Ameneiro

Colo o mesmo que dixen hai uns dias:Acostumo a diferenciar entre unha Institución e quen a dirixe nun momento determinado e a politica concreta que se fai nese momento. Deixando eso aparte, considero que o recorte presupostario da RAG é un ataque mais á cultura galega, polo que todo o meu apoio a quen loite contra esa inxustiza. O cal non significa que apoie, nen comparta, nen esqueza a castrapeirización da nosa lingua dos actuais académicos, nen os "supostos" enchufismo desa institución (que non son cousa dun só académico senón unha práctica habitual continua no tempo).

1 O Príncipe dos Mouros

"Castrapeirización" di aquí o filólogo, insultando o criterio de estandarización dos académicos profesionais. En que te baseas para sosteres iso? Non queremos reintegratas acomplexados na RAG. O galego é a lingua que falan os galegos na maneira en que a falan os galegos. Se para ti iso é "castrapo" e non che gusta o galego, non o fales e punto, cona.

2 outeiro

¡Canta razón ten a princesiña! O gallego é a lengua que falan os gallegos na maneira en que a falan os gallegos.

3 O Principe dos Mouros

Descansa, anda. Estás cansado.

4 Ameneiro

O reintegracismo é unha realidade na Galiza, goste ou non, unha realidade escrita que medra moderadamente entre os galegos falantes, cousa que non acontece entre outras familias "ortográficas". O meu apoio é á Institución, se queres un apoio incondicional a todos os seus membros, ao todo o que fan e como o fan, é outro debate, e unha auditoria non iria mal. Por certo a RAG, non é só tua para decir que queres nela e que non. E mentres a pague, teño todo o dereito a opinar sobre ela e a ter a miña idea do que deberia facer.

8 O Príncipe dos Mouros

Os do BNG, por certo, construíndo o nacionalismo galego paso a paso [nótese retranca implícita]

7 blancolexitimo

Sempre dándolle voltas ó mesmo chocolate conxuntural sen querer ver o estructural que sostén toda esta montaxe: a "Ley Electoral" e a "Ley de Partidos" xeneran unha oligarquía político-sindical que é sempre corrupta por ser oligárquica: ferrines, baltares, blancos por parellas, sindicalistas con soldos millonarios nos C. de A. das Caixas de todos, periodistas afíns nos timóns dos púlpitos... É A OLIGARQUÍA. É a clase dirixente que controla todos os mecanismos do poder e que solo quere pastorear rebaños para que as participacións do Gordo sempre as teñan todas eles e os seus. Hoxe é por un, mañá é por outro, pero ós galegos de abaixo nunca lles toca a lotería. Pero necesitan da infantería, esa que escribe nestes medios ¿á marxe do poder?