O ciclo de concertos 'Galicia Emerxe' reúne medio centenar de artistas e grupos

Medio centenar de artistas e grupos profesionais galegos participarán no ciclo de concertos 'Galicia Emerxe', impulsado pola Xunta dentro do plan de reactivación do sector cultural e turístico fronte aos efectos da crise da COVID-19.

A iniciativa, segundo explicou a Xunta nun comunicado, dispón dun orzamento de 500.000 euros para achegar ingresos e liquidez económica a estes artistas, así como unha nova plataforma de difusión do seu traballo en diferentes canles audiovisuais.

Neste sentido, o proxecto conta coa implicación da CRTVG para emitir os diferentes episodios de 'Galicia Emerxe', que adaptarán o seu formato para ser difundidos tamén pola Radio Galega, así como en Youtube e en plataformas de música en streaming.

Está previsto que os concertos, dunha media hora de duración, sexan gravados durante o mes de setembro no Museo Centro Gaiás da Cidade da Cultura de Galicia, en vivo e con presenza de público, sempre seguindo as indicacións en canto ao número de espectadores e medidas de seguridade ditaminadas para ese momento polas autoridades sanitarias.

Nesta primeira quincena do mes de xuño farase pública a convocatoria para a selección dos solistas e bandas do 'Galicia Emerxe', que deberán ser propostas por axencias ou representantes con dedicación profesional e serán elixidas por unha comisión independente atendendo a criterios como a traxectoria artística, a actividade recente ou a perspectiva de xénero, entre outros.

BAIXO A PANDEMIA

Este sábado, 6 de Xuño, a TVG estrea o documental 'Baixo a pandemia', un traballo da produtora M International Audiovisual, cuxos responsables reflexionaron, tras estalar a crise da COVID-19, acerca da necesidade que plataformas e televisións terían sobre contido relacionado con este período.

Ás poucas semanas, a TVG anunciou unha convocatoria para este tipo de iniciativas, que gañou o proxecto de M International grazas ao seu "enfoque humano e testemuñal". O feito de que o proxecto estivese "moi avanzado" fixo posible "adaptarse aos tempos e orzamento esixidos pola TVG", apuntan os seus responsables.

A gravación das 18 entrevistas, explican desde a produtora, tívose que facer cun protocolo estrito de seguridade e co "mínimo personal" posible.

Músicos en concerto. Unión de Músicos Profesionais