Xunta, universidades e Consello Forestal avanzan nos contidos do futuro Inventario Forestal Continuo
O inventario pretende facer un seguimento do estado das masas arboreas de Galicia.
Por E.P. | SANTIAGO DE COMPOSTELA | 04/06/2020 | Actualizada ás 12:37
A Xunta, as universidades de Santiago e Vigo, e representantes de organizacións que integran o Consello Forestal de Galicia participaron este xoves nunha 'videoxornada' de traballo para avanzar nos contidos do futuro Inventario Forestal Continuo de Galicia.
Na xornada, na que participou o director xeral de Planificación e Ordenación Forestal, José Luís Chan, presentáronse os resultados dunha enquisa elaborada pola Universidade de Santiago de Compostela e na que participaron os membros do Consello Forestal, coa finalidade de coñecer a súa opinión sobre o proxecto do Inventario.
Así, analizáronse as demandas e necesidades que as organizacións involucradas no sector queren que se incorporen a ese Inventario. Así mesmo, presentáronse diferentes alternativas técnicas para dar cumprimento aos requisitos expostos a través das enquisas.
Na reunión deste xoves, por outra banda, a Consellería de Medio Rural creou un grupo de traballo coas organizacións sectoriais que transmitiron as súas inquietudes a través das enquisas, co fin de manter aberta unha "liña de participación e transferencia de resultados parciais no desenvolvemento do Inventario Forestal Continuo".
O Inventario é un documento que teñen como obxectivo establecer unha "folla de ruta conxunta" para facer seguimento da cantidade e estado das masas de arboredos en Galicia, así como para crear unha estratexia de apoio ás decisións en materia de política forestal, mediante un sistema "monitoraxe forestal continuado".
A súa elaboración dá cumprimento a unha das recomendacións do ditame da Comisión Especial non permanente de estudo e análise das reformas da política forestal, de prevención e de extinción incendios. Así, no devandito ditame establecíase que era necesario crear un sistema de información e estatística para facer diagnósticos adecuados, e como ferramenta á hora de tomar decisións políticas públicas ou empresariais.
