Ciudadanos tamén quere reducir a campaña electoral a unha soa semana

Ciudadanos enviou unha carta o resto de forzas políticas galegas que se presentan aos comicios do próximo 12 de xullo para pedirlles "unha mostra de exemplaridade" e tratar de acordar con eles a redución da campaña electoral á metade do tempo estipulado por lei, é dicir, sete días.

Segundo indica a formación laranxa nun comunicado, na misiva remitida aos partidos, a candidata de Cs, Beatriz Pino, argumentou que "ninguén entendería que cunha pandemia mundial" chegasen as eleccións e os políticos fixesen "coma se nada".

Por este motivo, considera que a súa proposta "non é só unha maneira de minorar o gasto electoral que os galegos non comprenderán, senón tamén de evitar situacións de risco, actos multitudinarios ou un exceso de convocatorias masivas que poidan supor pasos atrás na loita contra o virus".

Ademais, a formación liberal cre que con esta acción tamén se evidencia "unha mostra de respecto e sensibilidade cara ás familias, ante as consecuencias sanitarias e socio-económicas da crise provocada pola COVID-19".

"Desde Ciudadanos queremos contribuír a minimizar o desgaste social e económico dos galegos e continuar centrando os nosos esforzos na reconstrución adaptando a campaña ás circunstancias actuais", traslada Pino, convencida de que os dirixentes políticos deben ser "exemplares".

O PP XA O PUXO SOBRE A MESA

O PPdeG xa expuxera reducir a campaña electoral a unha semana, pero non transcenderon movementos concretos encamiñados a que as forzas políticas senten para tratar de chegar a un acordo respecto diso.

E é que a resposta, desde os partidos que conforman a oposición galega no Pazo do Hórreo, non tivo grande repercusión. No mellor dos casos, aparece condicionada ao incremento dos debates televisivos, un punto que non aparece, polo menos a priori, na axenda do PPdeG -que deu a entender que o presidente e candidato, Alberto Núñez Feijóo, participará nun, o que organice a TVG-.

Máis polémica foi a resposta inicial que deu o PSdeG aos populares cando aconsellou á formación que dirixe Feijóo que, se quería reducir a campaña, puxese "un bozo" ao seu secretario xeral, Miguel Tellado.