A Xunta reserva 24 millóns para axudas directas a produtores e pemes do rural
O conselleiro pide aos integrantes do Consello Agrario delimitar cales son os sectores máis afectados pola pandemia.
Por E.P. | SANTIAGO DE COMPOSTELA | 16/06/2020 | Actualizada ás 16:24
A Consellería do Medio Rural investirá 165 millóns de euros no seu plan de reactivación e dinamización para facer fronte á crise provocada pola covid-19, dos que 24 millóns serán para axudas directas a produtores e pequenas e medianas empresas (pemes) afectadas pola pandemia.
Estas axudas directas serán dun importe máximo de ata 7.000 euros por produtor e de ata 50.000 euros por peme, segundo trasladou o conselleiro, José González, quen pediu este martes, nunha reunión co Consello Agrario, que os integrantes deste órgano trasladen cales son os sectores máis afectados.
"Non queremos deixar ninguén atrás", esgrimiu, posteriormente, nunha rolda de prensa na que estivo acompañado pola secretaria xeral técnica da Consellería, María Jesús Lorenzana.
Nesta liña e para evitar que ocorra como axudas do Goberno central que, por unha inadecuada "definición" non chegaron "onde teñen que chegar", asegurou que, cos datos "obxectivos", a Xunta fará unha delimitación dos sectores e procederá a cubrir as "perdas de renda" rexistradas debido á crise do coronavirus.
A priori, avanzou que o sector lácteo respondeu "bastante ben" á crise tanto en prezos como en vendas, mentres que o vitivinícola si que experimentou unha notable caída de vendas, mentres que no vacún de carne, por exemplo, descenderon os prezos.
IMPACTO ECONÓMICO DE MÁIS DE 568 MILLÓNS
González presentou aos axentes do sector os detalles deste plan que, cun investimento de 165 millóns, prevé un impacto económico estimado de máis de 568 millóns de euros no tecido produtivo do rural galego.
O plan parte de tres grandes obxectivos: fortalecer a competitividade dos distintos sectores produtivos do rural nun contexto marcado polo coronavirus, impulsar a promoción e comercialización cunha estratexia de diferenciación baseada na calidade e na diversidade, e reforzar e pór en valor o labor dos sectores agrogandeiro e forestal para manter a vida e a paisaxe rural.
Así mesmo, susténtase en cinco eixos de actuación: a promoción, a comercialización e a internacionalización dos produtos agroalimentarios galegos; a sustentabilidade económica dos sectores agrogandeiro e forestal; o reforzo da resiliencia do territorio rural; a formación, a innovación e a dixitalización; e a simplificación e flexibilización administrativa.
De entre as 14 medidas e 36 accións que conforman o detalle do documento, o conselleiro destacou, sobre todo, as axudas directas aos sectores produtivos orientadas a garantir que a súa actividade continúa. Cando se concreten os sectores máis afectados, articularase unha orde de axudas específica.
