Detidas 10 persoas nunha operación contra o tráfico de drogas en Ourense

Axentes da Policía Nacional de Ourense culminaron "unha laboriosa investigación" coa detención de 10 persoas, sete homes e tres mulleres, no marco dunha operación contra o tráfico de drogas.

Así o informou a Policía Nacional, que destacou que os detidos na denominada 'Operación Virgo' foron imputados como presuntos responsables dos delitos de tráfico de drogas e de pertenza a grupo criminal.

A operación arrancou a comezos do mes de marzo cando o Grupo de Estupefacientes tivo coñecemento de que varias persoas se trasladaban a un punto do Barrio de Barrocanes para mercar as substancias. A investigación, destaca a policía, estendeuse a distintos barrios da cidade e culminou co establecemento dun dispositivo policial no que procedeu á detención de 10 persoas os días 15 e 16 de xuño e a catro rexistros domiciliarios e dous de garaxes.

MATERIAL INTERVIDO

Na operación foron intervidos 8.320 gramos de haxix, 1.127 gramos de cocaína, 296 gramos de marihuana, 190 pastillas de MDMA, cinco gramos de metanfetamina, oito plantas de marihuana 367 gramos de sustancia de corte.

Os axentes recuperaron 46.909 euros en metálico, cinco básculas de precisión, un vehículo Audi S-3, material informático e teléfonos móbiles, dúas armas longas e unha de aire comprimido, unha pistola eléctrica tipo Tasser e outros utensilios para preparación das distintas sustancias para a súa distribución.

UN TRABALLO "COMPLICADO"

A Policía Nacional destacou o carácter "complicado e laborioso" da investigación, que foi desenvolta na súa prácftica totalidade durante o período do estado de alarma. A identificación das persoas á fronte da venda de droga, así como a análise do 'modus operandi' de cada un, foi desenvolta no seo do confinamento.