O vicepresidente da Xunta cita os partidos para abordar o protocolo electoral

O vicepresidente da Xunta, Alfonso Rueda, citou os representantes das principais forzas políticas a unha reunión telemática este venres, 19 de xuño, para abordar o protocolo polo que se rexerán as eleccións autonómicas do 12 de xullo, que levarán a cabo tras a desescalada pola crise sanitaria do coronavirus.

Precisamente, aínda que Galicia xa entrou na denominada "nova normalidade" esta semana, a situación que rexerá as próximas semanas será igualmente con medidas de seguridade sanitaria, como o é o uso xeneralizado de máscaras en espazos pechados e ao aire libre en que non se pode garantir unha distancia social que evite posibles contagios.

Neste escenario, e con eleccións en apenas tres semanas --comicios que se cancelaron para o 5 de abril pola pandemia e que se celebrarán se non hai cambios na situación epidemiolóxica--, o vicepresidente autonómico convocou os partidos políticos para abordar as medidas de seguridade, tal e como confirmaron a Europa Press fontes do Goberno autonómico e dos partidos convocados.

Nesta reunión, fontes da Xunta explicaron que se abordará o protocolo electoral, que inclúe desde a repartición de material, o número de persoas que pode haber nos colexios o día da cita coas urnas --pendente de clarificar estaba o papel de interventores e apoderados, por exemplo-- e outras cuestións de intendencia.

Inicialmente, a previsión é tratar o protocolo sen entrar en cuestións concretas de campaña, aínda que poderían ser resoltas dúbidas dos partidos políticos. De feito, fontes das formacións políticas consultadas por Europa Press confían en que este encontro sirva para resolver detalles de como se poden celebrar os actos da carreira cara ás urnas, que comezará o vindeiro venres 26.

PROTOCOLO

O protocolo articulado pola Xunta para a xornada electoral do 12 de xullo en Galicia recolle un reforzo das medidas de seguridade sanitaria nos colexios, que inclúen dar prioridade no acceso aos maiores de 65 anos, gardar a distancia de seguridade, o uso obrigatorio de máscaras e colocar "en lugares de fácil acceso" as cabinas de votación "tratando de evitar" as cortinas para non ter que manipular este elemento.

Estas medidas xa foron obxecto dunha reunión coa Federación Galega de Municipios e Provincias, posto que os concellos son colaboradores no desenvolvemento das eleccións. Non en balde, xa foron adaptados os colexios electorais dos municipios galegos ás medidas de seguridade previstas pola Xunta.

Segundo recolle o protocolo, os electores que acudan a votar deberán levar de forma obrigatoria máscara: ben a que leven do seu domicilio ou unha das que estarán á súa disposición no local electoral. Teranlla que apartar no momento da identificación para emitir o voto. Tamén deberán hixienizar as mans de forma obrigatoria co xel hidroalcohólico que haberá nos locais antes de facer entrega do seu sufraxio.

A Xunta recomenda que, na medida do posible, se leve o voto preparado de casa para evitar ao máximo os contactos. Con todo, as cabinas de votación estarán en zonas accesibles e tratarase de evitar as cortinas, co fin de que non sexa preciso manipular este elemento.

No plano organizativo, a directriz do protocolo é que se tente manter a distancia de seguridade de dous metros. De non ser posible, e ao levar equipos de protección, determínase que se deberá gardar en todo caso "un metro como distancia mínima". Os locais deberán ser correctamente ventilados, antes e durante a xornada electoral, ademais de que se intensificarán as actuacións de limpeza e desinfección previamente e no propio día. De feito, os concellos poderán solicitar que se desinfecte antes da xornada.

Como novidade, á marxe dos representantes da Administración que velan por que cada proceso discorra con normalidade, este 12X a Xunta contratou 133 coordinadores con coñecemento en prevención de riscos. Visitaron os colexios e buscáronse localizacións alternativas para os que non se axustaban.