Traballadores da industria electrointensiva volven á rúa para reclamar solucións e viabilidade

Unha concentración convocada polos traballadores da industria electrointensiva volveu levar este sábado á rúa na Coruña as demandas do sector, que pide solucións que garantan a viabilidade das súas actividades e manter o emprego. Estiveron presentes representantes da planta de Alcoa en San Cibrao (Lugo), de Alu Ibérica, de Ferroatlántica, entre outras, ademais de membros de sindicatos e algúns partidos políticos.

A concentración produciuse ante a Delegación do Goberno, ente berros de "Se non hai solución, Goberno dimisión" ou "Non máis reunións e máis solucións". As pancartas reclamaban, entre outras cuestións, respostas para A Mariña, onde o expediente de regulación de emprego (ERE) exposto por Alcoa ameaza 534 postos de traballo, e unha intervención en Alu Ibérica, por cuxo futuro temen os traballadores tras a venda ao Grupo Risco.

O presidente do comité de empresa en Alu Ibérica, Juan Carlos López Corbacho, explicou que decidiron levar á protesta a petición aberta dunha intervención da compañía para que pase a mans públicas e se dean garantías para os postos de traballo porque houbo "incumprimentos moi graves" das empresas.

Esta reivindicación, sinalou, non lles fixo deixar de lado a reclamación de que se estableza un prezo da electricidade "competitivo e estable" para a industria cun consumo intensivo da mesma.

O Consello de Ministros aprobou este venres o fondo de reserva de garantía para entidades electrointensivas, co que se pretende apoiar á gran industria na compra de enerxía 'verde' a través de contratos de compra e venda de electricidade a longo prazo ('PPA', polas súas siglas en inglés). Isto, manifestou López Corbacho, é "un paso" e estes contratos, "o futuro", polo que hai que "potencialos", pero é necesario un estatuto para evitar que nesa "transición" pechen empresas.