Detido un veciño de Pontevedra por golpear cunha barra de ferro a súa exparella embarazada

A Policía Local de Pontevedra detivo a un home acusado de agresión pola súa exparella embarazada, á que supostamente golpeou cunha barra de ferro.

Segundo informaron fontes da Policía Local, este individuo golpeou á muller cunha barra de ferro ás 6,40 horas deste domingo no domicilio da vítima na Rúa Nova de Arriba.

O atestado da detención reflicte que a Policía Local acudiu ao lugar dos feitos tras ser requirida pola propia vítima, quen relatou que fora agredida pola súa exparella, coa que xa non convive, cunha barra de ferro coa que foi golpeada na cabeza e na man dereita.

Segundo o relato da vítima, o home acudiu ao domicilio coa escusa de recoller unhas pertenzas que aínda mantiña no piso e chamou tan insistentemente á porta que a muller decidiu abrirlle para que non seguise molestando á veciñanza.

A vítima tamén sinalou que non era a primeira ocasión na que recibe golpes e ameazas por parte do detido a pesar de advertirlle que se atopa embarazada.

O presunto agresor foi localizado en compañía dun amigo cando se dirixía nun vehículo ao seu propio domicilio e, tras serlle solicitada a documentación identificativa por parte dos axentes, tentou darse á fuga a pé. Despois de ser detido a poucos metros, foi informado os seus dereitos.