Por Europa Press / Redacción | SANTIAGO DE COMPOSTELA | 02/07/2020 | Actualizada ás 09:00
De Ourense a Xapón e de Malpica a Rusia, xa son máis de 150 "sardiñas" as que conforman o particular 'banco virtual' de Embaixada.gal, cada unha delas cunha mensaxe e un deseño particular. “Estamos sorprendidos pola gran participación nesta iniciativa. Levamos varias realizadas e xa temos outras en curso pero esta foi un pouco caótica pola inmensidade colaborativa pero moi satisfactoria", apuntan dende a organización, nada en 2018 como un crisol para facer converxer a galeguidade da diáspora cos habitantes da terra.
Neste caso, a plataforma liderada por Alejandro Plaza e Xosé Lois Lucio tentou achegar á comunidade galega da emigración a unha festividade tan típica como o San Xoán empregando o recurso da sardiña. A idea é que a sardiña "embaixada", ·"tras varios meses confinada nas costas galegas debido ao Coronavirus, decidiu deixarse arrastrar polas correntes dos mares do mundo en busca de amigas coas que compartir e gozar dunha noite tan especial".
Desta sardiñada universal resultan os máis de 150 deseños aloxados no cartaz na páxina, dispoñible para descarga a todos os usuarios. Os internautas tamén poden deseñar a súa propia sardiña para incluíla no muro e unirse a un 'banco' que abrangue varios continentes e tamén múltiples zonas do Estado. Dende a asociación bótanlle humor e fantasía para celebrar unha iniciativa que, en definitiva, pretende "espallar a conciencia da galeguidade polo mundo": "percorremos todos os mares e de cada un deles foi entrando o froito da irmandade. Dende Asia a Europa, dende Europa ás Américas, dende Galiza a todo ou mundo. Porque somos e seremos pobo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.