En Común cre que a súa presenza é "decisiva" para a perda da maioría absoluta do PP

A coalición Galicia En Común-Anova Mareas erixiuse como "decisiva" para un posible "cambio" na Xunta porque, segundo o seu candidato á Presidencia do Executivo autonómico, Antón Gómez-Reino, "disputa" escanos ao PP nas circunscricións da Coruña e Pontevedra que "son claves" para que Alberto Núñez Feijóo "perda a maioría".

"Os galegos teñen que saber que cada voto a Galicia En Común é un voto menos ao PP e achéganos a eses poucos miles de votos e a ese deputado ou dous deputados que hai que quitar ao PP para que perda a maioría", sentenciou este mércores en declaracións aos medios en Santiago a cabeza de lista da alianza de esquerdas.

Segundo Gómez-Reino, "os votos a Galicia en Común van ser decisivos" porque, di, a súa candidatura "disputa" ao PP escanos nas circunscricións da Coruña e Pontevedra, polo que volveu a apelar á participación do electorado "progresista" nas eleccións do 12 de xullo.

"Os que pensaban quedar en casa ou non tiñan claro se ir votar, que saiban que se van e son deputados para Galicia En Común, son deputados menos para o PP e estamos máis preto de ter unha maioría progresista", incidiu Gómez-Reino, que na noite deste mércores manterá un encontro 'en liña' co expresidente boliviano Evo Morais.

Este encontro, como explicou, abre un ciclo de "conexións diarias coa cidadanía galega" que manterá Gómez-Reino ata o final da campaña e nos que participarán tamén "mandatarios, exmandatarios e referentes" de Galicia, o Estado e doutros puntos do planeta.

O candidato á Presidencia da Xunta de Galicia en Común, Antón Gómez-Reino, no debate televisivo a sete organizado pola radiotelevisión galega (CRTVG), o único debate electoral programado na campaña. CRTV