Confirmados seis positivos na expedición do Fuenlabrada mediante seroloxías

O Servizo Galego de Saúde (Sergas) confirmou seis positivos por coronavirus da expedición do Club de Fútbol Fuenlabrada, confinada nun hotel da Coruña, tras as análises serolóxicas realizadas a oito persoas na mañá deste mércores. Desta forma, ratifícanse os resultados obtidos nas PCR que se lle practicaron o martes aos membros do persoal.

O xerente da área sanitaria coruñesa, Luís Verde Remeseiro, explicara que o estudo serolóxico pretendía resolver as "discrepancias" entre a listaxe inicial facilitado polo club de fútbol na tarde do luns, que rexistraba oito positivos, co seis que resultaron das probas PCR realizadas xa na Coruña (un deste seis non coincidía coa lista inicial entregada polo equipo).

Esta mesma mañá, o conselleiro de Sanidade, Jesús Vázquez Almuiña, confirmou, ademais, que as persoas afectadas por Covid-19 pasarán a súa corentena na cidade da Coruña, aínda que non descartou que os que teñen PCR negativa poidan desprazarse a Madrid para continuar a corentena.

O responsable de Sanidade tamén avanzou que se realizarán catro probas diagnósticas a contactos relacionados co brote pero que non teñen vinculación co club. Trátase de tres condutores de autobús e un afeccionado que están en illamento no seu domicilio da cidade. Fontes hospitalarias explican que "posiblemente" este xoves se coñezan os resultados destas PCR.

PROBAS A XENTE RELACIONADA CO BROTE

A Consellería de Sanidade realizará este mércores unha PCR a catro contactos relacionados co brote do Fuenlabrada, pero que non teñen vinculación co club, á vez que confirmou que os casos positivos cumprirán a súa corentena na Coruña.

Nunha rolda de prensa tras participar no Comité Clínico, o conselleiro de Sanidade, Jesús Vázquez Almuiña, explicou que, ademais das 46 PCR realizadas á delegación do Fuenlabrada, das que seis foron positivas, faranse catro probas a outros tantos contactos, neste caso non vinculados co club.

Trátase, en concreto, de tres condutores de autobús e un afeccionado que tiveron contacto cos positivos e que xa están en illamento no seu domicilio, na Coruña.

Tras ter coñecemento destes posibles positivos dentro do Fuenlabrada, que se desprazou á Coruña para xogar contra o Depor, Sanidade realizou probas PCR a 46 persoas da delegación do club. Delas, seis deron positivas e puxéronse en illamento, do mesmo xeito que os seus contactos.

O conselleiro destacou, no entanto, a "discrepancia" entre os datos proporcionados polo laboratorio privado de Madrid --que falaba de oito positivos-- e os detectados polo Sergas, que repetiu probas serolóxicas a toda a delegación. Estas confirmaron este mércores os seis casos.

Derivado do traballo dos rastreadores, con todo, ampliáronse os contactos vinculados a outro catro persoas sen nexo co club, tres condutores de autobús e un afeccionado, que tamén gardan corentena. O conselleiro destacou que Sanidade está en "contacto permanente" coa Comunidade de Madrid, á que dá traslado dos seus datos e onde tamén se realiza "rastrexo aos contactos" que viven na capital española.

CÁMARA DE COMERCIO DA CORUÑA

A Cámara de Comercio da Coruña alertou das "graves consecuencias" sanitarias económicas e "de imaxe" que está a provocar o brote de coronavirus do Club de Fútbol Fuenlabrada para a cidade. Segundo a entidade, o caso "está a xerar un grave dano á inmellorable reputación" da Coruña.

A través dun comunicado de prensa, o comité executivo da Cámara apunta que se reserva "a posibilidade de esixir as responsabilidades de toda índole" na afección ás empresas coruñesas e traslada o seu "total apoio" ás "reivindicacións que se efectúen desde outros ámbitos locais".

A entidade cameral afirma que recibiu "queixas" de empresarios de hostalaría, turismo, comercio e servizos e denuncia que a "suposta actuación neglixente" do club, LaLiga e a Federación Española de Fútbol provocou "o menoscabo na xestión exemplar que vén caracterizando á Xunta, ao Concello e á cidadanía no seu conxunto".

Segundo o comunicado, o brote de coronavirus está a xerar un "prexuízo directo" ao Real Club Deportivo da Coruña e tamén está a ter "repercusións especialmente negativas" á aerolínea Iberia que, di, trasladou á expedición ata A Coruña.