O Campus Ourense Rugby portará o logo da Federación Española de Bancos de Alimentos no seu uniforme
O presidente do Banco de Alimentos de Ourense, Cecilio Santalices, agradeceu este "xesto sincero e de corazón por parte de toda a familia do rugby".
Por E.P. | SANTIAGO DE COMPOSTELA | 24/07/2020 | Actualizada ás 18:05
O Campus Ourense Rugby presentou este venres o seu novo equipamento para a tempada 2020-2021, na que levará o logotipo da Federación Española de Bancos de Alimentos (Fesbal).
O presidente do Campus Ourense Rugby, José Luís Rey, anunciou durante a presentación celebrada na sala de prensa do Pazo Provincial que "o Club lucirá esta camiseta tanto na División de Honra B como no resto de categorías e grupos da Escola".
"Centrándonos nos valores que promove o noso club, quixemos recoñecer o labor que realiza a Federación Española de Bancos de Alimentos a favor das persoas máis necesitadas do noso país e, por iso, decidimos incluír o logo no noso equipamento", explicou José Luís Rey.
Pola súa banda, o presidente do Banco de Alimentos de Ourense, Cecilio Santalices, agradeceu este "xesto sincero e de corazón por parte de toda a familia do rugby" que segundo recoñeceu, "dálles máis impulso para continuar traballo co obxectivo de axudar ás persoas que máis o necesitan".
"Trátase dun acto xeneroso que ten moitísimo mérito porque en lugar de deixar este espazo da súa camiseta para un patrocinador, o Campus Ourense Rugby decidiu mostrar o seu recoñecemento á Federación Española de Bancos de Alimentos e estámoslle completamente agradecidos", destacou Cecilio Santalices.
O presidente da Deputación de Ourense, Manuel Baltar, resaltou "a importancia" de que Fesbal apareza na camiseta de "un equipo tan representativo para a provincia de Ourense como é o Campus Ourense Rugby".
TRABALLO DE FESBAL
Neste contexto, Baltar tamén puxo de manifesto a "cooperación" da Deputación de Ourense con esta iniciativa que "axunta deporte e solidariedade, unha disciplina nobre como é o rugby co sacrificado traballo que fan os voluntarios das asociacións de Bancos de Alimentos e a súa federación, Fesbal, que engloba a 54 entidades en toda España e á que lle foi outorgada o premio Príncipe de Asturias da Concordia en 2012".
Ademais, Manuel Baltar subliñou tamén o traballo solidario do Banco de Alimentos de Ourense, "co que a Deputación de Ourense colabora económica e loxisticamente". Unha cooperación que Cecilio Santalices agradeceu, especialmente durante os meses de pandemia, nos que o Banco de Alimentos de Ourense "repartiu máis de 477.000 quilos de alimentos e colaborou con máis de 6.000 familias".
Por outra banda, en consonancia cos valores que promove o Club Campus Ourense Rugby e atendendo ao contido social, o presidente do Club, José Luís Rey, anunciou que "teñen previsto crear unha fundación cuxas funcións serán, entre outras, a creación dun equipo de rugby inclusivo e a posta en marcha dun programa de reinserción en institucións penais".
