Un traballador industrial cobra de media 6.000 euros ao ano máis que un cociñeiro
Os salarios na industria son os máis altos de Galicia.
Por Europa Press / Redacción | SANTIAGO DE COMPOSTELA | 31/07/2020 | Actualizada ás 10:49
Os salarios medios dos traballadores da industria son os máis altos de Galicia, con 25.871,64 euros de media ao ano, tras incrementarse un 3,4% en 2019 respecto de 2018.
Este venres, o Instituto Galego de Estatística (IGE) publica datos de custos laborais e salarios de 2019 coincidentes cos feitos públicos a semana pasada polo INE, pero profunda na estrutura salarial dos traballadores galegos.
De tal forma, obsérvase que os empregados da industria reciben un salario superior en 3.346 euros aos traballadores da construción (22.525,48 euros de media). Unha diferenza que se fai máis patente con cociñeiros ou camareiros que traballan no sector servizos (19.917,67 euros de media), onde se perciben 5.953,97 euros menos de soldo anual.
Pola súa banda, o salario medio galego subiu un 3,4% en 2019 ata alcanzar os 21.173,42 euros. Este incremento é superior ao 2% de avance na media española. Con todo, a cifra galega é 2.277 inferior aos 23.450,25 euros de media do país.
O custo laboral neto por traballador ao ano sitúase en Galicia en 28.856 euros en 2019, o que supón un 3,8% máis que no exercicio anterior. Aquí súmase os 21.173,42 euros de soldo e os 7.682,62 de custos non salariais. Son 2.775 euros anuais menos que a media española (31.631,8 euros).
