Por Europa Press / Redacción | Santiago de Compostela | 04/08/2020 | Actualizada ás 17:52
O comisario Juan Cástor Vázquez Salgado, que participou nas investigacións sobre a desapareción do Códice Calixtino e na do accidente do Alvia en Angrois, tomou este martes posesión como novo xefe da Comisaría da Policía Nacional de Santiago de Compostela.
Juan Cástor Vázquez Salgado, que ata a data ostentaba o cargo de comisario xefe da Brigada Provincial de Seguridade Cidadá da Coruña, substitúe a Félix García García á fronte da Comisaría da Policía Nacional en Santiago de Compostela.
No acto a subdelegada do Goberno na Coruña, Pilar López-Rioboo, sinalou como "retos inmediatos" para o novo comisario da Comisaría Local de Santiago "garantir a celebración dun Xacobeo seguro" e continuar co labor de protección da seguridade da poboación na actual situación sanitaria.
Así o indicou na toma de posesión de Cástor Vázquez, nun acto no que estivo acompañada polo xefe superior de Policía de Galicia, José Luís Balseiro, e no que enxalzou a traxectoria e valía profesional do novo responsable da Comisaría de Santiago, que leva 37 anos na organización policial.
CURRÍCULO
O novo comisario de Santiago ingresou en 1983 na Escola Superior de Policía e incorporouse o 1 de agosto de 1985 á Comisaría Local de Sabadell como inspector, onde se especializou en Policía Científica.
En xullo de 1999 iniciou a súa andaina na Comisaría Local de Santiago de Compostela, na Brigada Local de Policía Xudicial ata que no ano 2007 ascende a inspector xefe.
Unha vez finalizado o período de formación reincorporouse á Comisaría de Santiago, onde os seguintes anos asumiu a Xefatura da Brigada de Policía Xudicial. En 2014, tras o seu paso por Policía Xudicial, asume a Xefatura da Brigada Local de Estranxeiría e Fronteiras da Comisaría compostelá, ata o seu ascenso a comisario en 2019.
Finalizado o período formativo desde o mes de xaneiro deste ano ostentaba a Xefatura da Brigada Provincial de Seguridade Cidadá da Coruña.
Entre os servizos de relevancia nos que interveu ao longo da súa vida profesional, inclúese en 2011 a investigación sobre a desaparición do Códice Calixtino e en 2013 a relativa ao accidente do Alvia en Angrois no que morreron 80 persoas e 150 resultaron feridas.
A iso súmase en 2019 a culminación da 'Operación Chipa' como responsable da Brigada de Estranxeiría e Fronteiras no marco da loita contra a trata de seres humanos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.