Un xulgado da Coruña ratifica as restricións da Xunta na comarca coruñesa
A xuíza entende que a orde adopta medidas que son "necesarias para os fins constitucionais que perseguen".
Por Europa Press / Redacción | A Coruña | 14/08/2020 | Actualizada ás 14:53
O xulgado do Contencioso-administrativo número 4 da Coruña ratificou este venres as restricións impostas pola Xunta na comarca coruñesa para reducir os contagios por COVID-19.
En concreto, ratifica as decisións adoptadas pola Consellería de Sanidade na orde de 12 de agosto sobre medidas de prevención como consecuencia da situación epidemiolóxica derivada da COVID-19 nos concellos da Coruña, Arteixo, Cambre, Culleredo, Oleiros, Abegondo, Bergondo, Carral e Sada, segundo informa o Tribunal Superior de Xustiza de Galicia (TSXG).
No auto, a xuíza entende que a orde adopta medidas que son "necesarias para os fins constitucionais que perseguen: evitar a propagación dunha enfermidade contaxiosa como a que nos ocupa" e engade que o fai "sen implicar un sacrificio desmedido, sendo limitadas territorial e temporalmente".
A propia Consellería de Sanidade, a través dos servizos xurídicos da Xunta, solicitara a ratificación das medidas acordadas na orde de 12 de agosto.
Nela, mantéñense as limitacións de dereitos fundamentais adoptadas no punto segundo da orde de 7 de agosto e que afectaba os concellos ante os casos detectados por COVID-19.
