Por Galicia Confidencial | SANTIAGO DE COMPOSTELA | 17/08/2020 | Actualizada ás 14:15
A cada vez menos días de que dea comezo o curso escolar máis atípico que se lembra o debate sobre o modelo escolar segue aberto e candente. A última intervención neste entorno cada vez máis tenso vén da man da Confederación de Anpas Galegas para manifestarse en contra dunha posibilidade que, apuntan, está a coller forza nestes días: que as familias poidan decidir se mandan ou non aos seus fillos e fillas ás aulas.
Segundo defenden dende a plataforma, nais e pais opóñense a esta formulación porque consideran que levaría a ter "diferentes tratamentos" para o alumnado galego. "Se podemos volver, volvemos todas coa máxima seguridade; se hai que quedar na casa, será por que debemos quedar todas coas máximas garantías de atención.
Ante esta circunstancia, nais e pais ábrense á posibilidade de contemplar unha volta "non presencial" ás aulas, sempre e cando se corrixan "no posíbel os erros do confinamento". "A volta ás clases pode ser virtual, total ou parcialmente, pero necesitamos ter a seguridade de que non vai haber alumnado de diferentes velocidades, e esa certeza só poderemos tela se o tratamento é homoxéneo para todas as crianzas galegas", destacan.
Por esta razón, rexeitan a posibilidade de que os pais poidan escoller se mandan ou non ós seus rapaces ás aulas: "non hai liberdade na escolla de opcións individuais que favorecen o tratamento desigual, e que poden provocar un desigual punto de partida nun futuro normalizado. Non hai liberdade cando a escolla se basea na dispoñibilidade de medios materiais que outra xente non poida ter", xustifican.
MODELO PRESENCIAL
Aínda que as anpas non se pechan á posibilidade de chegar a un modelo educativo baseado enteiramente en contidos virtuais, seguen a defender que "a volta as aulas debera ser presencial para todo o alumnado". Esta posibilidade, recoñecen, implicará "todas as seguridades e reforzos que as nosas fillas e fillos merecen e precisan". Con todo, dende a confederación xustifican este investimento de acordo co papel das escolas nos rapazada máis alá da "formación formal" dos rapaces: "a escola pública é garantía de igualdade, de tratamento uniforme a todas as nenas e nenos, independentemente da súas capacidades económicas, sociais ou familiares".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.