O centro de protección animal da Deputación de Pontevedra rescata 28 cachorros en 15 días

Destaca tamén o gran ritmo de adopción, con 352 cans que atoparon un novo fogar.

Por Europa Press / Redacción | PONTEVEDRA | 08/09/2020 | Actualizada ás 11:44

Comparte esta noticia

O persoal do Centro de Acollida e Protección de Animais (CAAN) da Deputación de Pontevedra rescatou nas últimas dúas semanas a un total de 28 cachorros, pertencentes a catro camadas, nos concellos de Salvaterra, A Cañiza e Meaño. As crías, de entre un e dous meses de idade, están a recuperarse nas instalacións de Armenteira.

A primeira das camadas, de sete cachorros, foi recollida no Concello de Salvaterra o 18 de agosto. Os catro machos e tres femias foron atopados coa súa nai en condicións críticas, con diferentes patoloxías e moi débiles, pero, afortunadamente, están a evolucionar de maneira favorable.

Posteriormente, o día 24, o CAAN rescatou a dez cachorros dunha zona de moi difícil acceso nun monte da Cañiza, despois do aviso dun particular. Neste caso, non se puido recoller nesa xornada á nai e os catro cans e seis cadelas están a evolucionar moi ben, a pesar de que foron recollidos con apenas un mes de idade. Finalmente, o 2 de setembro recolléronse outras dúas camadas de 5 e 6 cachorros en Meaño, a segunda delas coa súa nai.

O contrapunto destas recollidas de animais abandonados está no "excepcional ritmo de adopcións" que está a conseguir o CAAN este ano. Ata hoxe, foron xa 352 os cans que atoparon un novo fogar non só na provincia, senón en distintos puntos da xeografía galega e española, e mesmo en Portugal. A cifra está xa próxima á marca de adopcións logrado o pasado ano, dun total de 466, co que mesmo podería superarse a previsión de 500 adopcións que se mantiña para este 2020.

A maior parte destas adopcións (310) realizáronse por cidadáns de Galicia, aínda que hai que destacar que 12 cans atoparon novo fogar en Portugal e os restantes 30 animais viaxaron a outras comunidades españolas como Asturias, Castela-León, Castela-A Mancha, Cataluña, Navarra, Madrid e Andalucía.

Rescate de cachorros
Rescate de cachorros | Fonte: DEPUTACIÓN DE PONTEVEDRA

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta