Detectado un novo gromo de Covid-19 con seis afectados en Ourense e outro con cinco en Ribadavia

As autoridades sanitarias informaron este xoves da detección dun novo gromo de coronavirus con seis persoas afectadas no Concello de Ourense, así como doutro foco con cinco contaxios en Ribadavia.

En concreto, o novo gromo de Ourense, de orixe familiar, afecta a dous homes de 34 e 38 anos, tres mulleres de 33, 40 e 64 anos, e un menor.

Pola súa banda, o novo foco detectado en Ribadavia, tamén de orixe familiar, deixa o positivo de dúas mulleres de 51 e 84 anos e de tres homes, de 56, 18 e 14 anos.

Por outra banda, o gromo detectado entre mozos de Verín, que contaba con oito casos, sobe en dous, ata dez, tras os positivos dunha muller de 44 anos e dun mozo de 16.