Os Espazos +60 de Afundación retoman a súa actividade baixo un estrito protocolo sanitario

Afundación, a Obra Social de Abanca, reabre as súas 11 Espazos +60 de Galicia, que retomarán a súa actividade a partir do 21 de setembro --excepto o de Santiago de Compostela, que o fará o 15 de outubro-- para que os socios poidan acudir, baixo cita previa, a inscribirse nas actividades ofertadas ou aos servizos profesionais.

A cita poderana reservar chamando por teléfono ao seu Espazo +60 ou mediante a aplicación de mensaxería Whatsapp. As actividades, que se realizarán estarán adaptadas á situación actual baixo un estrito protocolo sanitario e comezarán a partir do próximo 15 de outubro.

Para levar a cabo a reactivación da actividade ordinaria foi prioritario a creación de "espazos seguros" mediante a implantación dunha serie de medidas, como a redución da capacidade nas actividades, a reorganización de horarios e de zonas de entrada e saída, a ventilación frecuente ou a supresión temporal da realización de actividades que supoñan compartir materiais, do servizo de prensa e de revistas en formato papel e xogos de mesa.

Así mesmo, o servizo de cafetaría permanecerá pechado e será obrigatorio manter en todo momento a distancia de seguridade recomendada. Ademais, prohíbese a entrada a aquelas persoas que presenten síntomas compatibles coa covid-19, a quen tivesen contacto cunha persoa contaxiada nos últimos 14 días, e ás persoas que viaxasen a zonas de risco nas últimas dúas semanas.

Afundación decidiu pechar os Espazos +60 o pasado mes de marzo, aínda que a súa actividade continuou. De feito, durante o confinamento puxéronse en marcha medidas de acompañamento telemático ás persoas socias, e no período de desescalada realizaron un traballo de redeseño e adaptación da súa actividade habitual ás novas circunstancias sanitarias, contando para iso coas opinións dos seus usuarios.