O documental sobre Moncho Reboiras será proxectado esta fin de semana nas salas de Cinexpo en Pontevedra
O concelleiro de Política Lingüística, Alberto Oubiña, aproveitou a presentación para pór en valor a importancia "de exhibir cinema en galego en cinemas comerciais".
Por E.P. | SANTIAGO DE COMPOSTELA | 23/09/2020 | Actualizada ás 17:05
'Reboiras. Acción e corazón', a película documental sobre Xosé Ramón Reboiras Noia, máis coñecido como Moncho Reboiras, a última vítima mortal da ditadura franquista en Galicia, exhibirase este fin de semana nas salas de Cinexpo de Pontevedra
O concelleiro de Normalización Lingüística, Alberto Oubiña, e o guionista e director do documental Alberte Mera, presentaron este mércores esta longametraxe con motivo da súa exhibición o sábado e o domingo, ambos os días ás 21,30 horas, e ademais a sesión do domingo contará cun coloquio no que participará o director.
A película combina 29 entrevistas de testemuñas con secuencias ficcionadas para ilustrar os momentos máis relevantes da vida deste sindicalista, político nacionalista galego e opositor á ditadura franquista.
Alberto Oubiña aproveitou a presentación para pór en valor a importancia "de exhibir cinema en galego en cinemas comerciais" e destacou o selo pontevedrés do equipo de rodaxe, con Jose Aragunde na dirección de fotografía, Samuel Lema na dirección de arte, Adrián Porima no son, e Tamara Andrés na produción. Tamén subliñou a vinculación do director coa cidade, posto que "Alberte Mera é de Vigo pero estudou no Campus de Pontevedra".
Pola súa banda, o director explicou que esta longametraxe reflicte "unha época dura e escura de Galicia e a loita de toda unha xeración por unha Galicia libre e xusta".
Alberte Mera asegurou que este documental salda unha "débeda histórica" coa figura de Moncho Reboiras e que tratou de "facerlle xustiza, a nivel técnico e artístico e niso puxemos todo o equipo o noso mellor empeño".
Tamén indicou que espera que a acollida que está a ter a película por parte do público e da crítica "sirva para dar un toque de atención e presionar á historiografía oficial e as altas institucións para que a Memoria galega tamén a teñan presente".
