O BNG esixe que o Goberno aporte unha "solución" ás pensións dos mariñeiros galegos que traballaron en Noruega
O Bloque rexistrou no Congreso unha iniciativa para instar o Goberno español a retomar as relacións con Noruega e pór solución a esta circunstancia.
Por Europa Press / Redacción | SANTIAGO DE COMPOSTELA | 28/09/2020 | Actualizada ás 17:07
O BNG instou ao Goberno español a "retomar as relacións diplomáticas" con Noruega para "dar solución" á "inxusta e dramática situación en que se atopan" os mariñeiros que traballaron naquel país e que "non perciben ningún tipo de pensión" do sistema social noruegués.
O deputado do BNG no Congreso, Néstor Rego, se reunión a pasada semana coa asociación que representa os intereses destes mariñeiros, Long Hope, para coñecer a situación pola que están a pasar eles e as súas familias.
Por mor deste encontro, Néstor Rego rexistrou no Congreso unha iniciativa para instar o Goberno español a retomar as relacións con Noruega e pór solución a esta circunstancia.
Rego criticou que, desde a súa constitución formal, o Executivo non mantivo ningún encontro con Long Hope para "dar conta das actuacións diplomáticas con Noruega" e "tentar resolver extraxudicialmente as graves consecuencias derivadas da falta de protección daquelas persoas que sufriron unha exclusión do sistema de seguridade social deste país".
Así mesmo, o deputado nacionalista requiriu á Ministra de Exteriores que aproveite a sesión de Delegadas e Delegados de Ministras e Ministros do Consello de Europa, que se vai a celebrar este martes e mércores, para reunirse co seu homólogo noruegués e buscar "unha solución á inxustiza social que comete Noruega cos mariñeiros galegos".
