Por Europa Press / Redacción | Santiago de Compostela | 15/10/2020 | Actualizada ás 16:22
O secretario xeral de UGT Galicia, José Antonio Gómez, cargou este xoves contra outro dos principais sindicatos no país, a Confederación Intersindical Galega. "A CIG está á altura da ultradereita no noso país, está á altura da dereita máis carca", asegurou.
Esta afirmación provocou o aplauso das decenas de sindicalistas de UGT que se deron cita na clausura do 5º Congreso da Federación de Industria, Construción e Agro de Galicia UXT-FICA, que tivo lugar nun hotel no municipio de Teo (A Coruña).
Na súa intervención, Gómez arremeteu contra a CIG, "un sindicato que está sempre á contra, que máis que defender aos traballadores está a debilitalos", que "defende os marcos". "Compórtanse como un sindicato corporativo nacionalista, como é o que son", reprochou.
"Sabedes dalgunha medida, algunha proposta que fixese o sindicato nacionalista durante esta pandemia, máis aló de criticar o que fixeron os outros? Eu non sei ningunha", incidiu nas súas críticas á CIG.
Por iso, o líder de UGT en Galicia chamou a "dicir nos postos de traballo" que é "o que fixo" a CIG "para axudar aos traballadores" nesta pandemia.
DIÁLOGO SOCIAL COA XUNTA
En cambio, Gómez agradeceu a presenza neste acto do vicepresidente segundo da Xunta e conselleiro de Economía, Francisco Conde, á vez que puxo en valor que a aposta de UGT polo diálogo social "continúa aí".
Remarcou que o acordo de setembro con Xunta e empresarios para o reforzo do diálogo social supón un "bo punto de partida", aínda que cre que fai falla traballar por fortalecer a industria, as políticas activas de emprego e os servizos públicos.
Xunto a isto, tamén se referiu á situación que atravesa Alcoa San Cibrao e pediu "non trasladar a mensaxe de que se vai resolver todo cun recurso xudicial".
Sobre este extremo, valora a "unidade do Goberno de España e a Xunta", pero avisa de que, se se produce o rescate de empresas con diñeiro de "todos", debe participación pública destas compañías. Aquí, Gómez tamén aplaudiu que a ministra de Transición Ecolóxica se puxese "arreo" a traballar sobre Alcoa, aínda que se queixou de que "tardou".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.