A mortalidade dos pacientes con Covid-19 pode duplicarse cando tamén están infectados polo virus da gripe

A evidencia recente mostra que a mortalidade dos pacientes con Covid-19 pode duplicarse cando tamén están infectados polo virus da gripe, sinala o Ministerio de Sanidade nunha nota, na recomenda a vacinación antigripal ás persoas que superaron ou padecen o coronavirus e pertencen aos grupos priorizados por risco na campaña deste ano, para "diminuír a probabilidade de complicacións por gripe".

Ademais, establece que se tiveron o coronavirus de forma leve ou asintomática, deberán vacinarse tras finalizar os días de illamento recomendados, mentres que nos pacientes ingresados por esta enfermidade será o persoal sanitario o que establecerá o momento adecuado para administrarlles a vacina tendo en conta a súa situación clínica.

Así mesmo, aos contactos estreitos dun caso confirmado de COVID-19, que pertenzan aos grupos nos que se recomenda a vacinación fronte á gripe, recoméndase que se vacinen unha vez superado o período de corentena se non desenvolveron síntomas.

O Ministerio que dirixe Salvador Illa lembra que non se coñecen contraindicacións médicas para vacinar ás persoas que superaron a Covid-19 e, en principio, non sería necesario esperar un tempo específico tras a enfermidade.

Todas as vacinas antigripais dispoñibles durante esta campaña son inactivadas. E as contraindicacións que presentan son, como na maioría de vacinas, o padecer unha enfermidade aguda moderada ou grave; sufrir unha reacción alérxica grave a algún compoñente da vacina ou despois de recibir unha dose previa de vacina antigripal.

Finalmente, destaca que a inmunosupresión e o embarazo non son contraindicacións para a vacina antigripal inactivada, é máis, estes grupos están priorizados para vacinación