A Xunta atrasa o confinamento do 60% de Galicia ata a medianoite do sábado
Feijóo dixera que ía producirse xa na tarde do venres.
Por Europa Press / Redacción | SANTIAGO DE COMPOSTELA | 05/11/2020 | Actualizada ás 10:26
As novas restricións nas cidades e máis de 50 municipios para facer fronte á propagación do coronavirus entrarán finalmente en vigor a medianoite do sábado, tal e como recolle a orde da Consellería de Sanidade publicada ao fío da medianoite deste xoves no Diario Oficial de Galicia (DOG).
A pesar de que o presidente da Xunta, Alberto Núñez Feijóo, dixera en rolda de prensa este mércores que as novas restricións, incluído o peche dos bares e restaurantes e novos confinamentos perimetrales, entrarían en vigor ás 15,00 horas deste venres, a orde do DOG atrasa a súa efectividade nove horas, ata a medianoite do sábado, excepto no municipio ourensán do Carballiño, onde arrincaron a medianoite deste xoves.
A orde tamén explicita que a eficacia das medidas estenderase ata as 15.00 horas do 4 de decembro, xusto antes da ponte da Constitución. En calquera caso, explicita que estas "serán obxecto de seguimento e avaliación continua", co que "poderán ser modificadas ou levantadas antes.
As novas restricións máis destacadas son o peche de actividades consideradas non esenciais, incluídos os establecementos de hostalaría, salvo os servizos de entrega a domicilio ou para a súa recollida no local. No caso dos establecementos de restauración de centros sanitarios ou para traballadores dunha empresa nada máis poderán manter o servizo de cafetaría, bar e restaurante e non poderán superar o 50% da súa capacidade.
