Por Galicia Confidencial | Celanova | 12/11/2020 | Actualizada ás 10:58
Os familiares tamén poderán controlar a xestión das residencias nas que están os seus seres queridos. Nun acordo histórico, xa que é a primeira vez que acontece en Galicia, un integrante das familias estará presente no Consello Reitor da Fundación Hospital San Carlos que dirixe a Residencia San Carlos de Celanova e que é de titularidade público-privada. Este centro foi un dos principais focos de contaxio en residencias ao inicio da pandemia e tivo que ser intervido pola Xunta.
REDE, a Federación Galega de Familias de Usuarios de Residencia e Dependencia, fai pública a súa satisfacción e ilusión polo acordo alcanzado entre a corporación municipal de Celanova e o Padroado da Fundación.
Ademais o Concello de Celanova concedeu unha subvención á Residencia San Carlos para compensar os efectos da crise da covid19 e que a dirección cifrou en 72.000 euros. As familias de residentes pensan que este diñeiro poderá servir para reforzar o persoal coa contratación dunha enfermeira máis até dotar o centro de atención especializada as
24 horas e durante toda a semana.
Tamén apostan por contratar persoal para tarefas específicas de limpeza e lavandaría, que veñen sendo desenvolvidas polas auxiliares" cunha carga de traballo que lles dificulta
realizar co debido coidado o labor propio da súa cualificación", din. Ademais, avogan por contratar máis auxiliares para manter o nivel da atención nas novas circunstancias que impón a pandemia.
"REDE está satisfeita polo traballo desempeñado polas compañeiras de Ourense, que se esforzaron en lograr que esta iniciativa saíse adiante cun respaldo unánime na corporación e moi amplo entre as traballadoras do centro e os membros da dirección", apunta nun comunicado ao tempo que pide que este acordo se faga efectivo "canto antes" e
que se establezan uns criterios aceptados por todas as partes para a elección dos
representantes das familias e da corporación municipal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.