Por E.P. | SANTIAGO DE COMPOSTELA | 16/11/2020 | Actualizada ás 19:19
A Consellería de Infraestruturas adxudicou --á empresa Iceacsa Consultores-- a xestión do novo contrato do chamado Plan de Aforamentos das estradas da Xunta, co que se medirá a intensidade de vehículos o próximos tres anos.
En concreto, recolleranse datos nas 372 estacións de aforamento fixas e móbiles. Para iso, empregaranse drones, datos de telefonía e 'big data' para obter máis información e con maior rapidez.
O contrato estará vixente a partir de 1 de xaneiro de 2021 por un período inicial de tres anos. Pode ser prorrogado outros dous anos máis, cun investimento ata os dous millóns de euros.
Segundo explica a Xunta, esta información permitirá "planificar e explotar acertadamente a rede viaria autonómica e racionalizar os investimentos".
Por exemplo, servirá para saber se é necesario realizar unha mellora nunha estrada, cando se debe facer unha ampliación de capacidade porque se rexistran circulacións moi elevadas ou se é oportuno construír vías alternativas. Tamén recompila os accidentes para fixar os tramos de concentración de sinistros.
Como principais novidades, o Plan de Aforamentos recolle novos instrumentos como a medición dos aforamentos nas sendas peonís e ciclistas. Tamén inclúe a adquisición de datos anónimos de posicionamento de teléfonos móbiles, que se analizarán con tecnoloxía 'big data' para obter información útil para seguridade viaria e a elaboración de mapas coa velocidade real de determinados puntos de estradas.
A rede de estradas de titularidade da Xunta rexistrou en 2019 un incremento anual do 2,6% en canto a quilómetros anuais percorridos polos vehículos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.