O TSXG rexeita a paralización de Reganosa solicitada por unha plataforma veciñal
A entidade advertía dos "perigos inherentes da carencia do plan de emerxencia exterior", que foi anulado pola sentenza do Supremo.
Por Europa Press / Redacción | Santiago de Compostela | 20/11/2020 | Actualizada ás 16:54
A Sección Segunda da Sala do Contencioso-administrativo do Tribunal Superior de Xustiza de Galicia (TSXG) rexeitou ordenar a paralización inmediata das actividades de recepción, almacenamento, regasificación e expedición de gas natural licuado da empresa Reganosa solicitada pola Plataforma de Veciños do Cruceiro de Mehá na súa petición de execución dunha sentenza ditada polo Tribunal Supremo en xullo de 2016.
A entidade advertía na súa solicitude dos "perigos inherentes da carencia do plan de emerxencia exterior", que foi anulado pola sentenza do Supremo.
Con todo, o TSXG rexeita esta argumentación e acepta a formulación tanto da Xunta de Galicia como de Reganosa.
De acordo coa resolución notificada este venres, a planta conta cun Plan de Emerxencia Exterior aprobado en 2013, polo que se considera que "a empresa tiña e ten a necesaria cobertura para continxencias de emerxencia derivadas do devandito plan".
E tamén se ratifica que a instalación dispón de plena cobertura urbanística de acordo coa modificación puntual aprobada en 2012, que foi confirmada por dúas sentenzas firmes do Tribunal Supremo.
De feito, a resolución xudicial notificada nesta xornada atópase na liña co auto ditado polo Supremo o pasado mes de maio, no que tamén se desestimou unha petición de paralización da actividade de Reganosa.
