Por E.P. | SANTIAGO DE COMPOSTELA | 23/11/2020 | Actualizada ás 14:21
Dúas mulleres necesitaron ser trasladadas ao Complexo Hospitalario Universitario de Ourense (CHUO) este luns tras sufrir outros tantos accidentes de tráfico na cidade de Ourense e no municipio da Peroxa, respectivamente.
Segundo informa o 112, o primeiro destes sinistros ocorreu sobre as 11,30 horas no lugar de Vilar de Astrés, no témrino municipal da capital provincial. A afectada, unha muller de 53 anos, necesitou ser evacuada tras caer co coche por un barranco.
Tras recibir o aviso, a central de emerxencias puxo os feitos en coñecemento dos bombeiros de Ourense ante a posibilidade de que houbesen persoas atrapadas no interior. No entanto, unha vez no lugar do accidente, comprobaron que os ocupantes estaban xa liberados e accesibles.
Finalmente, unha ambulancia de soporte vital avanzado derivou ao CHUO á muller tras constatar que precisaba asistencia médica polas feridas que presentaba, tal e como indican a Europa Press fontes do 061-Urxencias Sanitarias.
COLISIÓN CONTRA UN MURO NA PEROXA
Media hora despois, outra muller, de 74 anos, era trasladada ao hospital en ambulancia despois de que o vehículo que conducía chocase contra un muro no lugar de Abertesga. Tampouco neste caso se precisou excarcerar a ningún dos afectados, pero o 112 si puxo os feitos en coñecemento da Garda Civil de Tráfico e dos bombeiros do Carballiño.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.