Acusan a Renfe de recortar as axudas a discapacitados nas estacións galegas aproveitando a pandemia

Proseguen as presións para devolver as infraestruturas galegas ao estado anterior á pandemia. O sector ferroviario de CGT en Galicia vén de dirixirse á Xunta de Galicia para pedirlle que restitúa o “servizo presencial de atención a viaxeiros con problemas de mobilidade”. Segundo destaca a formación, esta prestación foi deposta coa chegada do Estado de Alarma sen que fora recuperada para todos os usuarios coa ‘nova normalidade’.

Isto non significa, porén, que o servizo fora cancelado de forma total, xa que segue dispoñible para aqueles viaxeiros que o soliciten con antelación. Porén, e a diferencia do que acontecía a comezos deste ano, os usuarios de Renfe que non fagan reserva non poderán contar co apoio. En concreto, CGT afirma que as apuntadas carencias están a ter lugar nas estacións ferroviarias de Santiago de Compostela, A Coruña, Ourense e Vigo-Urzaiz. 

Segundo destaca o sindicato, a falta deste servizo “está a supoñer que persoas con problemas de mobilidade, anciáns e discapacitados”, entre outros grupos, “non teñen vagón baixo que facilite a subida e baixada o tren”. Esta circunstancia, sosteñen, fai que algúns deles “desistan de viaxar”, se vexan obrigados “a aprazar a viaxe” ou mesmo que “sufran algunha incidencia na subida ou baixada do tren”.

DIFICULTADES PARA CONCILIAR

No eido laboral, o sindicato fai fincapé nos efectos deste servizo “anticipado” sobre as condicións dos traballadores de Renfe. Segundo destacan, esta circunstancia está levando a que os profesionais contratados “teñan unha dispoñibilidade case total”, xa que deben de estar pendentes “durante case todo o día” ante a posibilidade de que se xera “algunha asistencia”. CGT destaca que estas circunstancias deixan os traballadores “sen poder conciliar vida laboral e familiar”.

Ante estas circunstancias, a formación vén de remitir un escrito á Consellería de Política Social, así como a os tres grupos parlamentarios do hemiciclo galego, para que estes insten ao Goberno a repoñer o "servizo presencial" de atención a viaxeiros nas principais estacións galegas. O obxectivo sería impedir estas "incidencias" apuntadas e a problemática da difícil conciliación para os traballadodores.