A pandemia obriga a pechar catro escolas infantís e 51 aulas en Galicia

Os positivos seguen en descenso e sitúanse nos 1.011 casos.

Por Europa Press / Redacción | Santiago de Compostela | 01/12/2020 | Actualizada ás 16:32

Comparte esta noticia

A evolución da pandemia da COVID-19 en Galicia obriga a manter pechadas un total de catro escolas infantís xunto a 51 aulas ao longo do territorio galego. A pesar diso a incidencia mantén unha tendencia cara ao descenso de casos, cuns 1.011 positivos no sistema educativo. Así se desprende das cifras trasladadas este martes polas autoridades sanitarias respecto da situación do coronavirus nas instalacións educativas galegas, e nas que Vigo e A Coruña sitúanse como as áreas con maior número de contaxios nos centros, institutos e gardarías.

Aula baleira
Aula baleira | Fonte: Europa Press.

Galicia conta con dous novos peches de centros respecto deste sábado. En concreto, a escola infantil Chiquis de Pontevedra, que conta con dous casos confirmados, e a de Cáritas Tui-Vigo, que presenta un positivo.

Estes súmanse á escola infantil Bárcala de Cambre e de Xirandola de Compostela, que tiveron que pechar a pesar de contar cun único positivo, respectivamente.

A área de Vigo, que mantén o maior número de positivos, conta con 271 casos e 5 aulas pechadas, ademais dunha gardaría.

O máis afectado é o centro privado Plurilingüe As Acacias-Montecastelo, que suma agora uns 11 contagios.

A área da Coruña, con 226 positivos 14 aulas pechadas e unha escola infantil afectada, ten os puntos de maior incidencia no CEIP Virxe da Barca de Muxía, con once casos e tres aulas pechadas, e o CEIP Fogar de Carballo cunha decena de positivos.

Pontevedra, pola súa banda, mantén 147 contaxios en activo e 10 aulas afectadas, ademais dunha escola infantil, mentres que a área de Lugo rexistra 131 casos en centros educativo e sete aulas pechadas. O punto con máis incidencia é o CEIP Paradai, que conta cunha ducia de positivos.

Na área de influencia da capital galega, os centros contan con 112 positivos, catro aulas e unha escola infantil pechadas.

Ferrol mantén 81 casos e nove aulas pechadas, onde destaca o CEIP Couceiro Freijomil de Pontedeume, con 8 positivos e dúas unidades clausuradas.

A área de Ourense pecha a táboa con 43 contaxios e dúas unidades afectadas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta