O pallaso Peter Punk axudará a difundir o galego entre os cativos
A iniciativa comeza en Ribeira, chegará a 36 localidades desde xuño ata setembro e conta co apoio da Xunta.
Por GC Tendencias | Ribeiro | 08/06/2013 | Actualizada ás 00:04
Comeza unha nova actividade de promoción do uso do galego. Trátase do espectáculo de rúa “Peter Punk”, que os concellos anfitrións integrarán nos seus programas de festas locais para dinamizar a lingua galega de maneira lúdica entre a mocidade.
“Peter Punk” desenvolve un espectáculo de rúa pensado para ampliar a oferta de ocio en lingua galega dirixida á mocidade durante as festas do verán do seu concello que se moverá por 36 municipios. O coñecido espectáculo ofrece novos diálogos e números para presentar o idioma propio de Galicia como parte esencial da vida cotiá dos galegos nun formato de novo circo no que se combinan as máis variadas técnicas circenses cun humor adaptado á realidade e á lingua galegas.
Este sábado, en Ribeira, ás 12:00 horas na Praza do Concello (ou na Biblioteca Municipal, en caso de choiva) haberá un pase no marco da programación “Xuño da cultura e das artes”.
O calendario íntegro de “Peter Punk” pódese consultar en http://www.xunta.es/linguagalega/peter_punk.
Lingua e música da man de ‘FalaRedes’
Amais desta nova actividade, a oferta de programación gratuíta destinada ao público familiar que impulsa a Secretaría Xeral de Política Lingüística para a RDL continúa cos concertos musicais “A nena e o grilo nun barquiño” e mais “Rosalía Pequeniña”, integrados en “FalaRedes 2013”, que chegan esta fin de semana durante o tempo de lecer aos concellos de Piñor, Abegondo e Dodro.
As dúas propostas coinciden en empregar a música como fonte de transmisión da lingua galega, achegándoa ao terreo dos afectos e promovendo que as cancións non só queden no teatro, senón que se poidan seguir cantando na casa, no coche ou na escola.
Toda a información sobre “FalaRedes” está dispoñible nesta web.
