Reclaman o plus de perigo para o persoal da concesionaria de limpeza no hospital de Pontevedra

Comisións Obreiras reclama a Acciona, a empresa concesionaria da limpeza do complexo hospitalario de Pontevedra, o abono do plus de perigo ao persoal de limpeza.

Para iso, delegados sindicais participaron este venres nunha primeira concentración de protesta na entrada de consultas do Hospital Provincial.

Aseguran que este traballo "é fundamental para a prevención dos contaxios no ámbito hospitalario".

Segundo os delegados sindicais, a maioría do persoal do Servizo Galego de Saúde (Sergas) e do persoal do servizo da cociña do Hospital Provincial percíbeno, "e resulta tremendamente inxusto e discriminatorio que non lle afecte ao persoal de limpeza".

Ademais, tamén denunciaron a "actitude de pasotismo" da empresa Acciona, "que ten á venda o sector de Facility Services, onde está encadrada a limpeza hospitalaria, e que só está preocupada de facer caixa e negocio con esta división da empresa en beneficio do resto do grupo".

Sinalan que as traballadoras que realizan este labor están sometidas a un "sobreesforzo" en todas as quendas e estiman que non atopan compensación económica por parte da empresa cando a súa tarefa reduce o risco de que se produzan contagios dentro do recinto dos centros hospitalarios.

Afirman que o persoal de limpeza enfróntase a diario a ese risco de contraer covid-19 ao atoparse durante moitas horas exposto, mesmo durante máis tempo que os traballadores sanitarios.

Respecto diso, o secretario comarcal de CC.OO. José Ramón Piñeiro, considera que Acciona está a mostrar unha "desconsideración e falta de sensibilidade coas traballadoras".

Por último, os sindicalistas engaden que os EPI que teñen que utilizar fan que estean nunha situación de "sudoración permanente" e que fan o seu traballo mentres manteñen unha "vixilancia extrema para evitar o contaxio", de maneira que viven con "notable tensión".

Hospital Provincial de Pontevedra | Fonte: páxinas galegas