Vídeos da manifestación histórica da folga en Ferrol
Na Cámara galega o PP rexeita unha iniciativa sobre o naval en Ferrolterra, que incluía o dique flotante e carga de traballo.
Por Galicia Confidencial | Ferrol | 12/06/2013 | Actualizada ás 23:30
Miles de persoas tomaron este mércores Ferrol para denunciar a situación de abandono na que se atopa a comarca e a esixiron "solucións" ao PP pola "dramática situación" de Ferrolterra.
A cidade viviu unha xornada de folga convocada por CC.OO., CIG, UXT e USTG, secundada masivamente por negocios e empresas, e que concluíu cunha multitudinaria manifestación polas rúas de Ferrol. Velaquí o vídeo da manifestación realizado por GZvideos para a CIG:
A protesta iniciouse ás 12.00 horas na praza do Inferniño e finalizou na praza de Armas, fronte ao Concello, que quedou pequena para acoller o elevado número de participantes. Segundo o dato facilitado pola Policía Local, a manifestación saturou" até "5.800 metros cadrados" de superficie, o que podería supor unha cifra de participantes próxima aos 30.000 persoas.
Sindicatos e partidos
A protesta estivo encabezada polos secretarios comarcais do catro sindicatos convocantes e contou coa participación dos responsables en Galicia da CIG, Suso Seixo, e de UXT, José Antonio Gómez, así como o portavoz nacional do BNG, Xavier Vence, entre outros.
Na protesta, estiveron tamén presentes os traballadores de Megasa, que lembraron a ameaza da dirección da compañía de pechar a siderometalúrxica situada en Narón (A Coruña) no caso de que non se produza unha redución na súa tarifa eléctrica.
Todos os principais dirixentes sindicais coincidiron en resalta a importancia desta protesta e reclamaronlle á Xunta que "tome boa nota" do abandono no que se atopa a comarca. GZvideos resumiu así a xornada de paro:
O PP vota en contra de máis carga de traballo
Sen embargo, e mentres isto acontecía en Ferrol, na Cámara galega, os populares rexeitaron votar a favor dunha proposta que pedía máis carga de traballo. Na iniciativa do PSdeG, pedíase construír de forma inmediata o dique flotante ou dotar carga de traballo aos estaleiros, e despois de incluír a emenda do BNG, tamén solicitaba que a Xunta negociase a súa entrada en Navantia, como permite a lei de fomento do naval.
Os populares solicitaron votar por puntos a iniciativa, pero o PSdeG denegou esta posibilidade, co que ao ser votada no seu conxunto, a proposta foi rexeitada pola maioría parlamentaria. Previamente, o deputado do PPdeG Miguel Tellado censurara que a Xunta non podía construír o dique flotante.
Durante o debate, o autor da iniciativa, o socialista José Luís Méndez Romeu, puxo o acento en que Ferrolterra hai "a mesma taxa de ocupados que de parados" e a capital da comarca é a cidade que "máis poboación perde" en Galicia.
