Feijóo evita negar que incumprira o protocolo do Sergas trala súa polémica foto sen máscara

A polémica da foto de Feijóo con Pablo Casado sen máscara no Monte de San Pedro da Coruña chegou na mañá deste mércores ao pleno do Parlamento Galego. O voceiro do PSdG, Gonzalo Caballero, inquiriu ao Presidente da Xunta sobre a instantánea, tomada ás portas dun acto tralo cal todos os seus asistentes tiveron que ser sometidos a probas PCR. O Presidente da Xunta deu negativo, ante o cal decidiu non facer corentena, como manda o protocolo para contactos estreitos de positivos. 

Núñez Feijóo e Pablo Casado camiñando sen máscara no Monte de San Pedro, camiño dun acto do PP | Fonte: Nós Diario

Ante estas acusacións, Núñez Feijóo decidiu botar para adiante e, sen negar un incumprimento do protocolo, recriminou a Caballero a actuación dos membros do Goberno de coalición. "Vostede quere que me cuarentene. Que ocorre, que non quere que veña respostar ao parlamento?" comezou, para logo engadir “para cuarentenar o que fixeron os membros do goberno”, en relación a Sánchez, que “con PCR positiva, familiar, non se cuarentenou”. De forma paralela, aludiu á polémica presenza de Iglesias nun consello de ministros pouco despois do positivo de Irene Montero. 

O Presidente criticou entón que Caballero lle quixera “dar leccións sobre como cumprir estritamente o protocolo do Servizo Galego de Saúde”. “É algo sorprende, señor Caballero”, engadiu a continuación entre uns aplausos que proviñan só da súa bancada. Feijóo pechou así a a súa intervención, tal e como foi recollida nun vídeo polo portal de noticias da CRTVG, sen negar un incumprimento do protocolo do Sergas para contactos estreitos de positivos.