Adif di que a conexión Madrid-Galicia en AVE estará lista no segundo semestre de 2021

O Administrador de Infraestruturas Ferroviarias asegura que o tramo de Pedralba-Ourense, o que resta para a conexión de Galicia e Madrid por liña de alta velocidade ferroviaria, entrará en servizo durante o segundo semestre de 2021.

Así figura nun comunicado no que o Adif informa da execución estes días de traballos de mantemento de perfil e amolado de carril no tramo Pedralba de la Pradería-Ourense, que pertence á liña de alta velocidade que une Galicia con Madrid. Trátase, segundo explica Adif nun comunicado, de tarefas necesarias para a posta en funcionamento do servizo e realízase unha vez concluído a montaxe de vía entre Pedralba e Ourense.

A previsión é que as obras terminen antes de finalizar o ano, co que se actuou sobre a totalidade dos aparellos de vía do tramo, que inclúen desvíos e aparellos de dilatación instalados en viadutos. 

"O desenvolvemento dos diferentes traballos está plenamente aliñado co obxectivo de ter todas as probas realizadas e a posta en servizo do tramo ao longo do segundo semestre de 2021", conclúe o comunicado Adif.

O ministro de Transportes, José Luís Ábalos, visita as obras do AVE a Galicia en Laza (Ourense) xunto á presidenta de Adif, Isabel Pardo de Beira; o delegado do Goberno en Galicia, Javier Losada; e a conselleira de Infraestruturas, Ethel Vázquez, | Fonte: Europa Press