Denunciadas seis persoas por incumprir a normativa anti covid en Ferrol

Axentes da Policía Local de Ferrol detiveron na madrugada deste venres a un cidadán francés de 42 anos por conducir baixo os efectos de alcol, e denunciárono a el e a outras cinco persoas por incumprir distintos aspectos da normativa anti covid.

Os feitos producíronse ás 0.30 horas do venres 15 na zona de Basanta, onde unha patrulla que realizaba labores de vixilancia na rotonda da FE-13 viu como se aproximaban dous vehículos a alta velocidade e sen manter a distancia de seguridade.

Os policías seguíronos para interceptalos e, despois de que ambos os turismos fixesen cambios de dirección sen sinalizar, conseguiron darlles o alto no camiño de Carricoa. Alí comprobaron que en cada un dos automóbiles viaxaban tres persoas, que non eran conviventes e que ningunha levaba a máscara de protección, polo que os seis foron denunciadas. Tamén se lles atribúe o incumprir o horario permitido para a libre circulación de persoas.

A maiores, os axentes practicáronlles a ambos os condutores a proba de alcoholemia. O test realizado a un deles deu negativo, mentres que o outro, o do home detido, foi positivo. O home identificouse como cidadán francés, indicou que non tiña domicilio en España, que chegara había dous días e que estaba quedando en domicilios duns amigos.

Ao ter desde ese momento a condición de investigado e ao non ofrecer garantía suficiente de que comparecería ante a autoridade xudicial cando fora citado, por non achegar un domicilio, procedeuse á súa detención.

Control da Policía Local de Ferrol durante o peche perimetral da cidade. POLICÍA LOCAL DE FERROL