O PP rexistra no Senado unha pregunta "para insistir" en partidas orzamentarias para o Xacobeo
A senadora Pilar Rojo pide que se aclare se teñen previsto colaborar coa Xunta na celebración do Xacobeo e, nese caso, aclarar de que maneira ou, en caso contrario, as razóns de non facelo.
Por E.P. | SANTIAGO DE COMPOSTELA | 18/01/2021 | Actualizada ás 20:18
A senadora do PP por Pontevedra Pilar Rojo reclamou no Senado o apoio do Goberno central para o Xacobeo 2021-2022, segundo informa esta formación. A popular rexistrou unha pregunta ao Executivo e unha moción ante a Comisión de Cultura e Deporte "para insistir na importancia de que se aproben partidas orzamentarias concretas para apoiar o acontecemento cultural máis importante que vai ter lugar este ano e o próximo en Europa".
Na súa pregunta ao Goberno, Rojo pide que se aclare se teñen previsto colaborar coa Xunta na celebración do Xacobeo e, nese caso, aclarar de que maneira ou, en caso contrario, as razóns de non facelo.
OUTRAS INICIATIVAS
Por outra banda, a Xunta levou a cabo melloras paisaxísticas e de posta en valor do Camiño de Santiago no concello de Miño. As obras consistiron, segundo informa a Delegación Territorial, no embelecemento dos puntos de acceso e humanización do pavimento no trazado, entre outras actuacións.
Por outra banda, Correos informa que conta desde este luns, na súa oficina principal de Santiago de Compostela, cun novo cuño especial dedicado ao Ano Xacobeo. O cuño poderase empregar tanto para os envíos que saian da oficina a calquera punto de España ou do mundo como para selar as credenciais dos peregrinos que realizan a ruta xacobea.
