Ferido un operario tras caer dun tellado de oito metros de altura no que traballaba na Pobra
Cando chegou o 112 o home estaba consciente malia as feridas sufridas.
Por Europa Press / Redacción | SANTIAGO DE COMPOSTELA | 04/02/2021 | Actualizada ás 13:20
Un operario resultou ferido na mañá deste xoves despois de precipitarse desde unha altura cando traballaba nun tellado no lugar da Baiuca, no concello coruñés da Pobra do Caramiñal.
Segundo informou o 112 Galicia, os equipos de intervención que acudiron ao lugar dos feitos indicaron que o operario estaba consciente, pero sufrira feridas de consideración ao caer dunha altura dun oito metros.
O 112 tivo constancia do sucedido ao recibir unha chamada ás 10,00 horas deste xoves. Foron avisados Urxencias Sanitarias de Galicia-061, a Garda Civil, Policía Local e tamén Protección Civil da localidade.
Ao lugar o 061 enviou unha ambulancia de soporte vital básico que levou ao ferido ao Hospital do Barbanza, confirmaron fontes sanitarias.
