Xa hai data para poder volver pescar nos ríos galegos
A tempada de pesca fluvial ábrese o 21 de marzo e terminará a finais de xullo.
Por E.P. | SANTIAGO DE COMPOSTELA | 04/02/2021 | Actualizada ás 13:23
A tempada de pesca fluvial en Galicia abrirase o próximo 21 de marzo e terminará o 31 de xullo. Así o establece a orde publicade este xoves no Diario Oficial de Galicia, que tamén marca as condicións para a captura das distintas especies, como o salmón ou a troita. Segundo explica a Xunta, a publicación da orde que regula a tempada 2021 de pesca fluvial coincide coa entrada en vigor da Lei galega de pesca continental de Galicia, aprobada a principios do mes de xaneiro no Parlamento galego. Con todo, a regulación da pesca fluvial e os ecosistemas acuáticos seguirá rexida pola normativa do ano 1997 a condición de que "non se opoña á nova lei".
Así as cousas, o período para a captura de salmón estenderase do 1 de maio ao 31 de xullo, aínda que o termo da tempada podería adiantarse en función das cotas de captura. Nos tramos compartidos do Eo e os cotos do Ulla, a tempada concluirá o 30 de xuño. A captura está limitada a un exemplar por persoa e día. Ademais, deberá ter unha dimensión mínima de 40 centímetros (45 no caso dos cotos compartidos con Asturias).
Así mesmo, ese ano queda vedada a pesca de salmón no coto de Monteporreiro, no río Lérez; mentres que no Ulla queda limitado a 40 exemplares, no Mandeo, 5; no Masma; 15; oito no Miño e dez no coto de Salmeán. No resto de cotos do río Eo non haberá cota anual de captura.
No Ulla repítese este ano a iniciativa da pasada tempada, polo que se convida aos pescadores a doar as capturas de salmón que realicen nos cotos de Ximonde ou Santeles para o seu destino á reprodución artificial na piscifactoría de Carballedo ou a marcaxe para seguir a súa migración no río.
PESCA DO REO E TROITA
Pola súa banda, a pesca do reo realizarase do 1 de maio ao 31 de xullo, aínda que se prolongará ata o 30 de setembro nos cotos de Betanzos, Noia, Noval, Ombre, Padrón, A Ponche do Porto, Ribeiras, Segade, Traba, Xuvia e Lambre; e ata o 31 de agosto en Ponche Arnelas, Pontevea, Santeles, Sinde e Ximonde.
En canto á troita, a campaña irá do 21 de marzo ao 31 de xullo. Prorrogarase naqueles cotos con convenio de colaoración ata o 30 de setembro na modalidade de pesca sen morte, á vez que en augas salmoneras, nas de reo ou nas de montaña, a tempada non dará inicio ata o 1 de maio. O límite queda fixado en seis exemplares ao día por persoa cunha talla mínima de 19 centímetros.
XORNADAS HÁBILES
Deste xeito, a normativa establece como días non hábiles para a pesca os luns salvo aqueles que coincidan con festivos nacionais ou autonómicos. Ademais, só permitirase a pesca os xoves para a modalidade sen morte en todas as masas de auga coa excepción do 1 de abril (xoves santo).
En canto ás horas, poderá practicarse a pesca no período que comprende entre unha hora antes da saída do sol e unha hora despois do anoitecer en virtude das horas marcadas pola páxina web de Meteogalicia.
