Por Jessica Fernández | SANTIAGO DE COMPOSTELA | 11/02/2021 | Actualizada ás 15:20
'A innovación Pos-COVID a través da revolución do talento' . Esa é a temática da 16ª edición de Galiciencia, que se celebrará entre os días 26, 27 e 28 de maio de maneira online debido ás restricións provocadas pola actual situación sanitaria.
Unha das principais novidades da Galiciencia online 2021, en consonancia coa actividade do Parque Tecnolóxico de Galicia (Tecnópole) de promoción do STEM feminino, é que haberá un premio especial para o mellor proxecto liderado por unha rapaza.
O obxectivo desta iniciativa é contribuír á igualdade de xénero na contorna da I+D+i desde a etapa educativa, promovendo a participación e o liderado femininos nos proxectos científicos e tecnolóxicos.
Con respecto da participación feminina nas diferentes edicións de Galiciencia como elaboradoras e presentadoras de proxectos, os datos amosan unha tendencia á alza. Nos últimos tres anos obsérvase que a participación feminina supera á masculina, chegando a acadar o 60 %.
A MAIOR FEIRA CIENTÍFICA DA COMUNIDADE GALEGA
O Parque Tecnolóxico de Galicia (Tecnópole) promove, dende 2006, Galiciencia, a maior feira científica que se celebra na nosa comunidade. Esta busca achegar a ciencia á sociedade, contribuíndo a espertar neles as vocacións científicas.
Ademais, conta co apoio da Xunta de Galicia, a través da Axencia Galega de Innovación (Gain); e da Fundación Española para la Ciencia y la Tecnología (FECYT).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.