Por E.P. | SANTIAGO DE COMPOSTELA | 13/02/2021 | Actualizada ás 11:53
A Consellería de Cultura, Educación e Universidade abriu o proceso de selección para a coprodución de tres novos espectáculos de calquera modalidade de danza co Centro Coreográfico Galego (CCG) ao longo deste ano.
A convocatoria, publicada o venres na páxina web da Agadic, inclúe a contratación da estrea e parte da exhibición dos proxectos elixidos. O prazo para a presentación de solicitudes empeza este sábado e prolongarase durante 20 días naturais.
Nun comunicado, o departamento que dirixe Román Rodríguez precisa que as bases se dirixen de forma específica a profesionais da produción escénica que realizan a súa actividade maioritariamente en Galicia, que deberán presentar proxectos orixinais que non fosen producidos con anterioridade.
Os espectáculos seleccionados recibirán unha achega económica que non poderá exceder o 80% do orzamento total do proxecto, cun máximo de ata 18.000 euros para cada un deles. Ademais, disporán das instalacións do CCG, na Coruña, para os ensaios e a montaxe das pezas.
Segundo recolle o documento publicado este venres, o prazo de execución dos proxectos elixidos non poderá superar os 12 meses a partir do contrato. Así mesmo, ás persoas adxudicatarias requíreselles acreditar a estrea do espectáculo e a realización dun mínimo de dúas representacións durante a duración do contrato, a maiores da estrea e das actuacións contratadas nas redes xestionadas pola Xunta.
As solicitudes para participar no proceso deberán achegar unha memoria explicativa, na que se inclúa a ficha de produción, o interese cultural e artístico do proxecto, e estratexias de difusión e promoción, entre outros datos.
Ademais, acompañarase do orzamento desagregado en gastos de persoal, produción e produción, así como o historial do equipo artístico. Para a selección dos proxectos crearase unha comisión de valoración, integrada por tres profesionais do ámbito das artes escénicas galegas, que terán en conta as características técnicas e económicas das propostas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.