Por E.P. | SANTIAGO DE COMPOSTELA | 20/02/2021 | Actualizada ás 15:46
O secretario xeral do PSdeG, Gonzalo Caballero, instou ao presidente da Xunta, Alberto Núñez Feijóo, a deixar "o regate curto" e a visión "a curto prazo" para pór en marcha un "gran acordo de país" que active proxectos impulsados con fondos europeos, un aspecto no que os socialistas ven a Galicia con "moito atraso" pola postura de "confrontación" do Goberno autonómico.
Caballero participou xunto ao presidente do PSdeG, Xoaquín Fernández Leiceaga, na mañá deste sábado na presentación do 'Plan Rexurde Galicia', a proposta dos socialistas galegos para o destino dos fondos extraordinarios habilitados pola UE para a reactivación da economía post pandemia. En total, a proposición do PSdeG fala de mobilizar uns 20.000 millóns de euros en investimento público e público-privada ata o ano 2027, así como outros entre 3.500 e 4.000 millóns de euros anuais.
"É a hora de traballar cooperativamente para sacar Galicia adiante, priorizando o emprendemento, a modernidade e a xeración de emprego", sentenciou Gonzalo Caballero, que insistiu na necesidade de alcanzar un "gran acordo de país" que implique, desde a Xunta, ás institucións, forzas políticas e actores sociais.
Todo iso para, en palabras do responsable socialista, avanzar cara a "unha Galicia verde, dixital, cohesionada e igualitaria", obxectivos que deben guiar a folla de ruta para aproveitar os fondos extraordinarios activados pola Unión Europea e que supoñen "unha oportunidade histórica".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.